जोनाथनको ह्याट्रिकमा ९ खेलाडीमा समेटिएको कतारमाथि क्यानडाको आधा दर्जन गोल

काठमाडौं। क्यानडाले कतारमाथि एकतर्फी जित निकालेको छ। फिफा विश्वकप २०२६ अन्तर्गत समूह ‘बी’ को खेलमा क्यानडाले कतारमाथि ६-० गोलको जित निकालेको हो। फिफा विश्वकपमा क्यानडाको यो पहिलो जित हो।

भ्यानकुभरस्थित बीसी प्लेसमा भएको खेलमा क्यानडाले सुरुदेखि नै आक्रामक खेल प्रदर्शन गरेको थियो। खेलको १६औँ मिनेटमा कतारका गोलरक्षक महमुद अबुनादाले जोनाथन डेभिडको प्रहार नियन्त्रण गर्न नसकेपछि साइल लारिनले नजिकैबाट गोल गर्दै टोलीलाई अग्रता दिलाए।

क्यानडाले २९औँ मिनेटमा अग्रता दोब्बर बनायो। ताजोन बुचाननको प्रयास डिफ्लेक्ट भएर आएको बलमा जोनाथन डेभिडले उत्कृष्ट भली प्रहार गर्दै गोल गरे। त्यसको चार मिनेटपछि कतारका डिफेन्डर होमाम एल अमिनले बुचाननमाथि फाउल गरेपछि सुरुमा पेनाल्टी दिइए पनि भिडियो सहायक रेफ्री (भिएआर) को समीक्षा पश्चात् फाउल पेनाल्टी क्षेत्रबाहिर भएको ठहर गरियो र एल अमिनले रातो कार्ड पाए। त्यसपछि १० खेलाडीमा सीमित कतार थप दबाबमा परेको थियो।

पहिलो हाफको इन्जुरी समयमा डेभिडले व्यक्तिगत दोस्रो गोल गर्दै क्यानडालाई ३-० को सहज अग्रता दिलाए। रिची लारियाको क्रसमा लारिनको हेडर अबुनादाले रोके पनि रिबाउन्ड बललाई डेभिडले खाली पोस्टमा प्रहार गर्दै गोल गरेका थिए।

दोस्रो हाफमा पनि क्यानडाको दबाब कायम रह्यो। ५३औँ मिनेटमा कतारका मिडफिल्डर असिम मादिबोले इस्माएल कोनेमाथि खतरनाक ट्याकल गर्दा भिएआर पछि सिधै रातो कार्ड पाए। त्यससँगै कतार नौ खेलाडीमा झरेको थियो। कोने भने घाइते हुँदै स्ट्रेचरमा मैदानबाट बाहिरिएका थिए।

कोनेको स्थानमा मैदान प्रवेश गरेका नेथन सालिबाले ६४औँ मिनेटमा करिब २० यार्ड टाढाबाट उत्कृष्ट फ्रिकिक गोल गर्दै क्यानडाको अग्रता ४-० पुर्‍याए। त्यसपछि ७५औँ मिनेटमा मोहम्मद अल मनाइले आत्मघाती गोल गरेपछि क्यानडा ५-० ले अघि बढ्यो।

इन्जुरी समयको दोस्रो मिनेटमा डेभिडले ह्याट्रिक पूरा गर्दै क्यानडाको ६-० को ऐतिहासिक जित सुनिश्चित गरे। यो जितसँगै क्यानडाले विश्वकप इतिहासमा पहिलो पटक तीन अंक जोडेको छ। दुई खेलबाट चार अंक बनाएको क्यानडा गोलअन्तरका आधारमा समूह ‘बी’ को शीर्ष स्थानमा उक्लिएको छ भने कतार एक अंकसहित तेस्रो स्थानमा रहेको छ।