दीपक भट्ट, शुलभ अग्रवाल र शेखर गोल्छाविरुद्ध सम्पत्ति शुद्धीकरणको मुद्दा दायर

काठमाडौं। सम्पत्ति शुद्धीकरण (मनी लाउन्डरिङ)सम्बन्धी मुद्दामा दीपक भट्टसहित ३९ जनाविरुद्ध विशेष अदालतमा मुद्दा दर्ता भएको छ।

प्रतिवादीमध्ये ३४ जना व्यक्ति र ५ वटा कम्पनी छन्। मुद्दा बिहीबार दर्ता गरिएको हो।

सम्पत्ति शुद्धीकरण निवारण ऐन, २०६४ अन्तर्गत दायर गरिएको मुद्दामा मुख्य प्रतिवादीका रूपमा भट्ट, शुलभ अग्रवाल र शेखर गोल्छासहित अन्य व्यक्तिहरू तथा कम्पनीहरूलाई समेटिएको छ।

अभियोगपत्रअनुसार प्रतिवादी दीपक भट्टमाथि २६ अर्ब ६३ करोड २७ लाख ७१ हजार ५९ रुपैयाँ ६८ पैसा बराबरको बिगो दाबी गरिएको छ। यस्तै, शुलभ अग्रवालमाथि २५ अर्ब ५९ करोड २० लाख ६ हजार १ सय २४ रुपैयाँ ३१ पैसा बराबरको बिगो मागदाबी गरिएको छ।

त्यसैगरी, शेखर गोल्छाविरुद्ध ५२ करोड ५० लाख रुपैयाँ बराबरको बिगो दाबी गरिएको अभियोजन पक्षले जनाएको छ।

सम्पत्ति शुद्धीकरण निवारण ऐन, २०६४ को दफा ३० को उपदफा (१) बमोजिम मुद्दा दायर गरिएको हो। अभियोजन पक्षले प्रतिवादीहरूले गैरकानुनी स्रोतबाट आर्जित सम्पत्तिलाई वैध देखाउने प्रयास गरेको आरोप लगाएको छ।

विशेष अदालतमा दर्ता भएको उक्त मुद्दामा अब कानुनी प्रक्रिया अगाडि बढ्नेछ। अदालतले प्रतिवादीहरूलाई उपस्थित गराई प्रारम्भिक सुनुवाइ गर्ने तथा प्रमाण र दाबीका आधारमा थप प्रक्रिया अघि बढाउनेछ।

हाल यो मुद्दा उच्च आर्थिक मूल्य र ठूलो संख्यामा प्रतिवादी संलग्न भएका कारण चासोका साथ हेरिएको छ। मुद्दाको अन्तिम टुंगो भने अदालतको निर्णयपछि मात्रै लाग्नेछ।