सुनको मूल्य लगातार चौथो दिन घट्यो, तोलामा ९०० रुपैयाँ सस्तिंदा बढ्यो चाँदीको भाउ

काठमाडौं। सुनको मूल्य लगातार चौथो दिन घटेको छ। सुनको मूल्य सोमबार प्रति तोला ९०० रुपैयाँ घटेर तोलाको २ लाख ९९ हजार ९०० रुपैयाँमा आइपुगेको छ।

सुन आइतबार तोलामा ८ हजार २०० रुपैयाँले सस्तिएको थियो। जेठ २० गते तोलामा ३ लाख ११ हजार ३०० रुपैयाँ रहेको सुनको भाउ त्यसयता लगातार घटिरहेको छ।

चाँदीको भाउ भने तोलामा १० रुपैयाँ बढेको छ। नेपाल सुनचाँदी व्यवसायी महासंघका अनुसार चाँदीको भाउ सोमबार प्रति तोला ४ हजार ९०५ रुपैयाँ निर्धारण भएको छ।