रियल सेक्टरका ३० कम्पनीको ३५.३५ अर्बको फाइल पेन्डिङ, सेबोन डेढ महिनादेखि अनिर्णीत

काठमाडौं। नेपाल धितोपत्र बोर्ड (सेबोन)मा आइपीओ निष्कासनका लागि आवेदन दिने उत्पादन तथा प्रशोधन क्षेत्रका कम्पनीको संख्या साढे दुई दर्जन पुगेको छ।

सेबोमा जेठ तेस्रो सातासम्म आइपीओ अनुमति माग गर्दै उत्पादन तथा प्रशोधन क्षेत्रका ३० वटा कम्पनीले आवेदन दिएका हुन्।

कम्पनीले अंकित र प्रिमियम मूल्यमा ३५ अर्ब ३५ करोड २२ लाख ८८ हजार रुपैयाँ बराबरको १६ करोड ६४ लाख २५ हजार कित्ता सेयर निष्कासनको अनुमति मागेका छन्।

सिमेन्ट, स्टील, डिष्टिलरी, औषधि र कृषिसँग सम्बन्धित उत्पादनमूलक उद्योग सञ्चालन गरेका कम्पनीले आइपीओ निष्कासन गर्न चाहेका छन्। आइपीओ अनुमतिका लागि २०८० देखि आवेदन दिएका कम्पनीको फाइल पाइपलाइनमा छ।

सेबोनमा अध्यक्ष नियुक्त नहुँदा पछिल्लो डेढ महिनादेखि आइपीओ अनुमति ठप्प छ। आइपीओ स्वीकृत नहुँदा पाइपलाइनमा कम्पनीको संख्या थपिंदै गएको हो।

सेबोनका कर्मचारीहरु आइपीओ अनुमतिको काम अध्यक्ष नियुक्त नभएकाले रोकिएको बताउँछन्। उनीहरुले अहिले कम्पनीको विवरण हेर्ने काम मात्रै गरिरहेका छन्।

प्रिमियम मूल्यको आइपीओ पछिल्लो तीन वर्षदेखि ठप्प छ। सेबोनले प्रिमियम मूल्यमा आइपीओ बिक्रीको अनुमति दिएको छैन।

आइपीओ निष्कासनको अनुमति माग गर्दै सेबोनमा आवेदन दिएका उत्पादन तथा प्रशोधन क्षेत्रका कम्पनी