काँग्रेसको नीतिगत तथा वैचारिक छलफल ‘ग्रीन टेबल’मा सिंगापुर विकास मोडलको विमर्श

काठमाडौं। नेपाली काँग्रेसको केन्द्रीय कार्यालय सानेपामा बिहीबार सिंगापुरको विकास मोडलबारे छलफल तथा विचार–विमर्श गरिएको छ।

काँग्रेसको नियमित नीतिगत तथा वैचारिक छलफल कार्यक्रम ‘ग्रीन टेबल’ अन्तर्गत आयोजित कार्यक्रममा सिंगापुरका प्रतिष्ठित आर्थिक एवं सार्वजनिक नीति विश्लेषक विद्वान लियोंग सी हियान प्रमुख वक्ताका रूपमा सहभागी थिए। कार्यक्रममा पार्टी सभापति गगनकुमार थापा, केन्द्रीय सदस्यहरू, सांसदहरू तथा युवा र अध्ययनशील व्यक्तिहरूको सहभागिता रहेको थियो।

कार्यक्रममा हियानले सिङ्गापुरले आर्थिक रूपान्तरण, सुशासन, नवप्रवर्तन, सार्वजनिक सेवा प्रवाह तथा जनकल्याणका क्षेत्रमा हासिल गरेका सफल अभ्यासहरूबारे विस्तृत प्रस्तुति दिए। आर्थिक समृद्धि, प्रभावकारी शासन प्रणाली, संस्थागत विकास तथा नागरिक केन्द्रित नीति निर्माणका लागि सिङ्गापुरबाट नेपालले सिक्न सक्ने महत्त्वपूर्ण पाठहरूबारे  विचार राखेका थिए।

हियानले सिंगापुर आर्थिक रूपमा समृद्ध भए पनि केही सामाजिक सूचकहरूमा अझै चुनौतीहरू रहेको उल्लेख गर्दै विकासको अन्तिम उद्देश्य नागरिकलाई खुसी बनाउनु हुनुपर्नेमा जोड दिए।

उनले भ्रष्टाचारविरुद्धका कानुनको कडाइका साथ कार्यान्वयन, मेरिट प्रणालीको अवलम्बन, नवप्रवर्तनलाई प्रोत्साहन तथा दीर्घकालीन नीतिगत स्थिरताका कारण सिंगापुरले छोटो अवधिमै उल्लेखनीय आर्थिक प्रगति हासिल गर्न सफल भएको बताए।

नेपालको सन्दर्भमा सुझाव दिँदै उनले सुशासनका लागि कठोर र प्रतिबद्ध हुनुपर्ने, साथै कृत्रिम बुद्धिमत्ता (एआई)  सूचना प्रविधि र नवप्रवर्तनमा केन्द्रित नीति अवलम्बन गर्नुपर्ने धारणा राखे।

कार्यक्रममा सहभागीहरूले नेपालको वर्तमान अवस्था र विकासका चुनौतीसँग सम्बन्धित विभिन्न प्रश्नहरू राखेका थिए। हियानले ती प्रश्नहरूको उत्तर नेपालकै सन्दर्भमा केन्द्रित भएर दिए।

कार्यक्रममा सभापति थापाले वर्तमान सरकारको प्रमुख प्राथमिकता पनि सुशासन रहेको बताइँदै आएको स्मरण गराउँदै सुशासनको अभियानमा काँग्रेस सहयोग गर्न तयार रहेको स्पष्ट पारे। सुशासनका लागि सरकारमा रहेका व्यक्तिहरूको व्यवहार र प्रतिबद्धतासमेत देखिनुपर्ने उनको भनाइ थियो।

काँग्रेसको ग्रीन टेबल छलफल शृङ्खलामा शुक्रबार पनि छलफल हुनेछ। शुक्रबार दिउँसो ४ बजेपछि हुने कार्यक्रममा मानवअधिकार आयोगको प्रतिवेदनका सम्बन्धमा विज्ञ तथा सरोकारवालाहरूसँग छलफल हुने संयोजक कञ्चन झाले जानकारी दिए।