कास्कीका सामुदायिक विद्यालयमा शिक्षा र खेलकुद प्रवर्धनमा मेटलाइफ नेपालको सहयोग

काठमाडौं । मेटलाइफ नेपालले कास्की जिल्लाका सामुदायिक विद्यालयहरुमा खेलकुद तथा शिक्षालाई प्रवर्धन गर्ने नयाँ पहल सुरु गरेको छ।

‘शिक्षा र खेलकुदमार्फत नयाँ पुस्तालाई सशक्त बनाउने’ उद्देश्यसहित सुरु गरिएको यस पहलअन्तर्गत मेटलाइफ नेपालले कास्कीका पाँच विद्यालयमा फुटबल सामग्री वितरण कार्य सुरु गरेको हो।

कार्यक्रम कर्मयोग फाउन्डेसनसँगको सहकार्यमा संचालन भइरहेको जनाइएको छ। यसले पहुँचबाट वञ्चित युवायुवतीहरूलाई खेलकुद र शिक्षाको अवसर विस्तार गर्न काम गर्दै आएको छ।

यस पहलमार्फत करिब १६० वटा फुटबलका साथै प्रशिक्षणका लागि आवश्यक सामग्रीहरू जस्तै कोन, गोलपोस्ट नेट, एयर पम्प तथा अन्य आधारभूत सामग्रीहरू उपलब्ध गराइनेछ।

साथै, छनोट भएका विद्यार्थीहरूलाई जर्सी पनि प्रदान गरिनेछ। जसले विद्यालयहरूमा व्यवस्थित खेल गतिविधिलाई प्रोत्साहन गर्नुका साथै सामुदायिक शिक्षामा नियमित खेलकुद संस्कृतिलाई पुनर्जीवित गर्न मद्दत पुग्ने विश्वास लिइएको छ।

यो कार्यक्रम शिक्षा क्षेत्रमा केन्द्रित मेटलाइफ नेपालको व्यापक संस्थागत सामाजिक उत्तरदायित्व अभियानअन्तर्गत संचालन गरिएको हो। विद्यालय केन्द्रित यस पहल मार्फत मेटलाइफर कर्मयोग फाउन्डेसनले बालबालिकालाई कक्षाकोठाको शिक्षासँगै खेलकुदबाट सिकिने टोली भावना, निष्पक्षता, धैर्यता र आपसी सम्मानजस्ता मूल्यहरू विकास गर्न सक्ने वातावरण निर्माण गर्ने लक्ष्य राखेको जनाएको छ।

यस पहलका बारेमा मेटलाइफ नेपालका महाप्रबन्धक निर्मलकाजी श्रेष्ठले भने, ‘विशेषगरी अवसर सीमित भएका सामुदायिक विद्यालयहरूमा खेलकुदले बालबालिकालाई एकताबद्ध गर्ने अद्वितीय शक्ति राख्छ। विश्वभर फुटबलप्रतिको आकर्षण बढ्दै गइरहेको अवस्थामा हामीले फुटबलमार्फत विद्यार्थीहरूमा आत्मविश्वास, सिकाइप्रतिको रुचि तथा चुनौती सामना गर्ने क्षमता विकास गर्न विद्यालयहरूलाई सहयोग गर्ने निर्णय गरेका हौं।’