सिमरा सेजका उद्योगले थाले उत्पादन, ६ उद्योग सञ्चालनमा, एक दर्जन निर्माणाधीन

वीरगन्ज (पर्सा)। सिमरास्थित विशेष आर्थिक क्षेत्र प्राधिकरणमा स्थापित उद्योगहरुले उत्पादन थालेका छन्। सरकारले सेजको अवधारणालाई कार्यान्वयनमा ल्याएपछि यहाँ आधा दर्जन उद्योग सञ्चालनमा आएका छन् भने एक दर्जन निर्माणाधीन छन्।

विशेष आर्थिक क्षेत्र प्राधिकरणमातहत अहिले ३४३ बिघा क्षेत्रफलअन्तर्गत विभिन्न ब्लकमा ६ वटा उद्योगले उत्पादन सुरु गरिसकेका छन्। सिमरास्थित विशेष आर्थिक क्षेत्र प्राधिकरणका प्रमुख पप्पु गिरीले सेजमा रहेका आधा दर्जनभन्दा धेरै उद्योगले उत्पादन थालिसकेको बताए।

‘सेज परिसरमा रहेका आधा दर्जन उद्योगले अहिले उत्पादन गरिरहेका छन्,’ उनले भने, ‘एक दर्जनभन्दा धेरै उद्योग अहिले निर्माणाधीन अवस्थामा छन्।’ सेजमा रहेको पशुपति सेरामिक्स प्रालिले सेरामिक्ससम्बन्धी वस्तु तथा सामान उत्पादन गर्दै आएको छ। उक्त उद्योगले करिब ४५० जनालाई प्रत्यक्ष तथा अप्रत्यक्ष रूपमा रोजगारी दिएको छ।

ब्रिलियन सु प्रालिले पनि जुत्ता तथा चप्पल उत्पादन गर्दै आएको छ। सेजमा रहेको अर्काे उद्योग बालाजी म्यानुफ्याक्चरिङले पनि उत्पादन थालेको छ। यस्तै नेपाल एग्रो टुल्स कम्पनीले पनि कृषि सम्बन्धित उत्पादन गर्दै आएको छ। एसीएम भेहिकल्सले पनि यहाँ उद्योग स्थापना गरेर उत्पादन गर्दै आइरहेको छ।

त्यस्तै, बायोकल्प नेपाल नामक कम्पनीले पनि उत्पादन गर्दै आएको विशेष आर्थिक क्षेत्र प्राधिकरणले जनाएको छ। चालु रहेका उद्योगमा करिब सात सयभन्दा बढीले रोजगारी पाएका छन्। सिमरास्थित विशेष आर्थिक क्षेत्र प्राधिकरणका सबइन्जिनियर अजयकुमार चौधरीले सिमरा सेजमै अहिले करिब एक दर्जनभन्दा धेरै उद्योग निर्माणाधीन अवस्थामा रहेको जानकारी दिए।

सेजमा औसत उद्योगले दुई करोडदेखि दुई सय करोडसम्मको लगानी गरेका छन्। प्रतिवर्गमिटर रु ५ का दरले लिजमा लिएर उद्योग सञ्चालन गर्ने प्रावधान छ। अहिले सेजमा नेपोभिट सेरामिक्स प्रालि, केभेक्स हिमालयन, रेम्बो एग्रो, ओमकार ग्रेनाइट प्रालि, बवाङ उइयाङ्ग बायो टेक्नोलोजी, लाडिकर प्रालि, ओममेघाश्री प्रालि, हुलास केबल प्रालि, मातारा मसला उद्योग, एभरेष्ट मसला प्रालि लगायत उद्योगका पूर्वाधार निर्माणाधीन छन्।

सिमरा सेजको ‘ए’ ब्लकमा ३४३ बिघा जग्गा छ। जहाँ अहिले आधा दर्जनभन्दा उद्योग चालु अवस्थामा छन् भने एक दर्जन उद्योग निर्माणाधीन छन्। त्यस्तै ‘बी’ ब्लकमा १२८ बिघा क्षेत्रफल छ। जहाँ ७० प्रतिशतभन्दा धेरै जग्गा प्राधिकरणमातहत नै छ। त्यस्तै ‘सी’ ब्लकमा भने ४९.५ बिघा जग्गा छ। त्यस्तै ‘डी’ ब्लकमा १३३ बिघा र ‘इ’ ब्लकमा १७८.५ बिघा जग्गा छ। रासस