ऋषभको बलियो ब्याटिङमा लखनउले हैदराबादलाई हरायो, आरसीबी चेन्नइविरुद्ध ब्याटिङमा

लखनउ सुपर जायन्टले सनराइजर्स हैदराबादलाई हराएको छ। इण्डियन प्रिमियर लिग (आईपीएल) अन्तर्गत आज सम्पन्न पहिलो खेलमा लखनउले कप्तान ऋषभ पन्तको प्रभावशाली ब्याटिङको सहायतामा हैदराबादलाई ५ विकेटले हराएको हो।

हैदराबादस्थित राजीव गान्धी स्टेडियममा टस हारेर ब्याटिङमा उत्रिएको घरेलु टोलीले निर्धारित २० ओभरमा ९ विकेट गुमाउँदै १५६ रन बनाएको थियो। शीर्षक्रमले कमजोर सुरुवात दिए पनि मध्यक्रममा हेनरिच क्लासनले प्रभावशाली ब्याटिङ गर्दै सर्वाधिक ६२ र नितिशकुमार रेड्डीले ५६ रन बनाए। तल्लो क्रम फेरि नचल्दा हैदराबादले औशत स्कोरमै चित्त बुझायो। बलिङमा लखनउका मोहम्मद सामी, अभेष खान र प्रिन्स यादवले समान २ विकेट लिँदा दिग्वेश राठी र मणिमरन सिद्धार्थले समान १ विकेट लिए।

जवाफी ब्याटिङमा उत्रिएको लखनउले १९.५ बलमा ५ विकेट गुमाएर लक्ष्य भेट्टायो। लखनउका लागि कप्तान ऋषभ पन्तले सर्वाधिक अविजित ६८ रन बनाउँदै टोलीलाई लक्ष्यसम्म पुर्‍याउँदा ऐडन मार्क्रमले ४५ तथा अब्दुल समदले १६ रनको योगदान दिए। हैदराबादका हर्ष दुबेले २ तथा एसान मालिंगा र शिभङ कुमारले समान १ विकेट लिए पनि लखनउलाई रोक्न सकेनन्।

आजै दोस्रो खेलमा रोयल च्यालेन्जर्स बेङ्ग्लुरु चेन्नइविरुद्ध ब्याटिङमा छ।