नेपाल र इटालीबीचको खेल सुरु हुनै लाग्दा वानखेडे आसपासमा जम्मा हुन थाले नेपाली समर्थक

मुम्बई। भारत र श्रीलंकामा जारी आईसीसी टी-२० विश्वकपअन्तर्गत नेपाल र इटालीबीचको खेल अब केही बेरमा सुरु हुँदैछ। यो खेल भारतको मुम्बईस्थित वानखेडे रंगशालामा हुनेछ।

खेल सुरु हुनुअघि वानखेडे आसपास मुम्बईमा नेपाली समर्थकहरूको भीड देखिएको छ। नेपाली झण्डा र जर्सीसहित समर्थकहरू उत्साहित देखिन्छन्।

यो समूह ‘सी’ अन्तर्गतको खेल हो। यस समूहमा नेपाल, इङ्ल्याण्ड, वेस्ट इन्डिज, स्कटल्यान्ड र इटाली छन्।

नेपालले आफ्नो पहिलो खेलमा इङ्ल्याण्डसँग निकै प्रतिस्पर्धात्मक खेल खेलेको थियो। जसमा नेपाल मात्र ४ रनले पराजित भएको थियो।

इटालीले आफ्नो पहिलो खेलमा स्कटल्यान्डसँग ७३ रनले हार बेहोरेको थियो। नेपाल र इटाली दुवैका लागि यो दोस्रो खेल हो।

समूहमा वेस्ट इन्डिजले इङ्ल्याण्डलाई हराउँदै बलियो स्थिति बनाएको छ। वेस्ट इन्डिजले दुई खेल खेलेर दुई जितसहित ४ अंक जोडेको छ।

इङ्ल्याण्ड र स्कटल्यान्डले एक/एक खेल जितेर २/२ अंक हासिल गरेका छन्। नेपाललाई सुपर ८ मा पुग्न इटालीसहित बाँकी तीनवटै खेल जित्नै पर्ने दबाब छ।