आन्तरिक पर्यटक तान्दै काभ्रेको बेथानचोक, गजराम पर्वतबाट देखिन्छ हिमशृंखला

काठमाडौं। काभ्रेको बेथानचोक गाउँपालिकामा पर्ने ‘बेथानचोक नारायणस्थान मन्दिर र गजराम पर्वत’ पर्यटकीय गन्तव्यको रुपमा परिचित छ।

यो दुवै पर्यटकीय गन्तव्य बेथानचोक गाउँपालिकाको वडा नम्बर ३ र ५ पर्छ। बेथानचोक गाँउपालिकाको वडा नम्बर ३ र ५ को सीमानामा रहेको गजराम पर्वत समुन्द्री सतहबाट ३ हजार १२ मिटर उचाइमा छ भने बेथानचोक नारायणस्थान ३ हजार १८ मिटरको उचाइमा छ।

धार्मिक र पर्यटकीय दुवै दृष्टिकोणले यो दुवै प्रसिद्ध गन्तव्यस्थल बन्दै गएको छ। नारायणस्थान मन्दिर महाभारत पर्वत शृंखलामध्ये काभ्रेको सबैभन्दा अग्लो र शृंखलाभरमा चौधौँ अग्लो शृंखलामा रहेको छ।

जिल्लाकै सबैभन्दा अग्लो स्थानमा रहेको नारायणस्थान मन्दिर र ५ मिटर कम उचाइमा रहेको गजराम पर्वत प्रकृति प्रेमी तथा साहसिक यात्रामा रुचि राख्नेहरूका लागि एक उत्कृष्ट गन्तव्यका रूपमा स्थापित हुँदै गएको छ।

बेथानचोक नारायणस्थान र गजराम पर्वत क्षेत्र पछिल्ला वर्षहरूमा आन्तरिक पर्यटनको आकर्षक केन्द्रका रूपमा विकास हुँदै आएको छ। विशेषगरी चैत–वैशाख र असोज–मंसिर महिनामा यहाँ दर्शन तथा पदयात्राका लागि बढी भीड लाग्ने गर्छ। सूर्योदय र सूर्यास्‍तका बेला लाङटाङ, गणेश हिमाल, गौरीशंकर लगायत हिमशृंखलाको मनोरम दृश्य अवलोकन गर्न सकिन्छ।

स्थानीय सरकारले पदमार्ग सुधार, विश्रामस्थल निर्माण तथा आधारभूत पूर्वाधार विस्तारमा पहल थालेको छ। धार्मिक आस्थासँगै क्याम्पिङ, फोटोग्राफी र छोटो दुरीको साहसिक यात्राका लागि पनि यो क्षेत्र उपयुक्त मानिन्छ। स्वच्छ हावा, हरियाली वन क्षेत्र र शान्त वातावरणले यसलाई प्रकृति प्रेमीहरूको रोजाइ बनाएको छ।