फाइनान्स कम्पनीलाई ब्याज आम्दानी वृद्धिले राहत, नाफा ५३ करोड, खराब कर्जा ५५.२६% सम्म

काठमाडौं। फाइनान्स कम्पनीहरुको नाफा धनात्मक भएको छ। आर्थिक वर्ष २०८१/८२ को ६ महिनामा ६५ करोड १ लाख ऋणात्मक रहेको नाफा यो वर्ष दोस्रो त्रैमासमा धनात्मक भएको हो।

चालु आवको दोस्रो त्रैमासमा फाइनान्स कम्पनीले ५३ करोड २० लाख रुपैयाँ खुद नाफा गरेका छन्। नियामकीय सहुलियतसँगै ब्याज आम्दानी बढ्दा र खर्च नियन्त्रणका कारण फाइनान्स कम्पनीहरुको नाफा बढेको हो।

फाइनान्स कम्पनीको ब्याज आम्दानी थोरै बढेको छ। चालु आवको ६ महिनामा फाइनान्स कम्पनीले १ अर्ब ९९ करोड रुपैयाँ ब्याज आम्दानी गरेका छन्। पोहोर ६ महिनामा यस्तो आम्दानी १ अर्ब ७४ करोड थियो।

पोहोर ६ महिनामा ७ वटा फाइनान्सको नाफा ऋणात्मक थियो। चालु आवको ६ महिनामा नाफा ऋणात्मक हुने फाइनान्स ३ वटा छन्।

नेपाल वित्तीय संस्था संघका अध्यक्ष तथा आइसीएफसी फाइनान्सका सीइओ सुनिल पन्त ऋण असुलीमा थोरै सुधार हुँदा नाफा केही बढेको बताउँछन्।

‘ऋण असुली व्यापक सुधार भएको अवस्था होइन। पछिल्लो समय केही सुधार भइरहेको छ,’ उनले भने, ‘बढ्दो प्रोभिजनिङले चुनौती बढिरहेको छ।’

घटेको ब्याजदरले कष्ट अफ फण्ड घटेर नाफामा केही सुधार भए पनि बढ्दो खराब कर्जाले कर्जा नोक्सानी थपिएको छ।

चालु आवको ६ महिनामा फाइनान्स कम्पनीहरुको प्रोभिजनिङ बढेको छ। पोहोर ६ महिनामा कम्पनीहरुले ७१ करोड ४२ लाख रुपैयाँ प्रोभिजनिङ गरेकामा अहिले बढेर ८६ करोड ५१ लाख पुगेको छ। प्रोभिजनिङ बढ्दा त्यसले नाफासँगै पुँजीकोषमा समेत असर गर्छ।

कम्पनीहरुको खराब कर्जा निरन्तर बढिरहेको छ। चालु आवको पुससम्म १५ वटा फाइनान्स कम्पनीको औसत खराब कर्जा १३.३४ प्रतिशत पुगेको छ। पोहोर ६ महिनामा फाइनान्स कम्पनीहरुको औसत खराब कर्जा १२.३५ प्रतिशत थियो।

जानकी फाइनान्सको खराब कर्जा सबैभन्दा धेरै ५५.२६ प्रतिशत पुगेको छ। सबैभन्दा कम आइसीएफसी फाइनान्सको खराब कर्जा ३.५१ प्रतिशत छ।