सुन एकैदिन साढे नौ हजार महँगियो, पुग्यो प्रति तोला ३ लाख १८ हजार ८ सय रुपैयाँ, चाँदी पनि उच्च

काठमाडौं। सुनचाँदीको मूल्यले लगातार कीर्तिमान बनाउने क्रम जारी छ। अघिल्लो दिनको तुलनामा बुधबार सुन तोलामा ९ हजार ५ सय रुपैयाँले बढेर प्रतितोला ३ लाख १८ हजार ८ सय रुपैयाँ भएको छ। चाँदी पनि ४ सय ३० रुपैयाँ बढेर प्रति तोला ७ हजार ३ सय रुपैयाँ पुगेको छ। यो हालसम्मकै उच्च मूल्य हो।

नेपाल सुनचाँदी व्यवसायी महासंघका अनुसार मंगलबार सुन प्रतितोला ३ लाख ९ हजार ३ सय रुपैयाँ थियो। त्यसअघि सोमबार ३ लाख ९ हजार रुपैयाँमा कारोबार भएको सुन चालु महिनाको दुई सातामै तोलामा ४२ हजार ३ सय रुपैयाँले महँगिएको छ। छोटो समयमै भएको तीव्र वृद्धिले बजार कारोबार प्रभावित भएको व्यवसायी बताउँछन्।

चाँदीको मूल्य पनि निरन्तर उकालो लागेको छ। अघिल्लो दिनका तुलना ४ सय ३० रुपैयाँ बढेर बुधबार तोलाको ७ हजार ३ सय रुपैयाँ पुगेको छ। सोमबारका तुलनामा ५ रुपैयाँको बढोत्तरीसहित मंगलबार तोलाको ६ हजार ८ सय ७० रुपैयाँ थियो।

गत सोमबार चाँदी तोलाको ६ हजार ७ सय ६५ र आइतबार ६ हजार ४ सय ८० रुपैयाँमा कारोबार भएको थियो। सुनसँगै चाँदीको मूल्यमा पनि उच्च बढोत्तरी छ।

विश्व बजारमा देखिएको मूल्यवृद्धिको प्रभाव सिधै नेपाली बजारमा परेको छ। अन्तर्राष्ट्रिय बजारमा बुधबार सुन प्रतिऔंस ५२५८.८७ डलर पुगेको छ, जुन मंगलबारको ५०८१.५७ डलरको तुलनामा उल्लेख्य वृद्धि हो। चाँदी पनि प्रतिऔंस १०९.७६ डलरबाट बढेर १७१.१५ डलरसम्म कारोबार भइरहेको छ।

विश्लेषकहरूले सुनचाँदीको मूल्यमा वृद्धिसँग सम्बन्धित अनुमानहरू सार्वजनिक गरिरहेका छन्। अन्तर्राष्ट्रिय स्तरमा धेरै बैंक र वित्तीय विश्लेषकहरूले सुनको मूल्य २०२६ को अन्त्यसम्म प्रति औंस करिब ६,००० डलरसम्म पनि पुग्न सक्ने बताइसकेका छन्। धेरैले मध्य अवधि (२०२७–२०२८) मा सुनको भाउ अझै बढेर ६,००० देखि ७,००० डलर प्रति औंससम्म पुग्ने अनुमान पनि गरेका छन्।

चाँदीको मूल्यबारे पनि उच्च तहसम्म पुग्ने अनुमानहरू सार्वजनिक भइरहेका छन्। अन्तर्राष्ट्रिय बजारमा औद्योगिक प्रयोग, सौर्य ऊर्जाको विस्तार, इलेक्ट्रिक सवारी र प्रविधि क्षेत्रमा बढ्दो मागका कारण चाँदीको मूल्य अझै बलियो रहने विश्लेषकहरू बताउँछन्।

केही अन्तर्राष्ट्रिय लगानी बैंक र कमोडिटी विश्लेषकहरूले आगामी एक–दुई वर्षमा चाँदी प्रतिऔंस १२० देखि १५० डलरसम्म पुग्न सक्ने अनुमान गरेका छन्। बजारमा अनिश्चितता बढेमा र सुनसँगै सुरक्षित लगानीको आकर्षण बढ्दै गएमा चाँदी १७० डलरभन्दा माथि पुग्ने सम्भावना पनि औँल्याइएको छ।

विश्लेषकहरूका अनुसार विश्व अर्थतन्त्रमा बढ्दो अनिश्चितता, भू–राजनीतिक तनाव, प्रमुख अर्थतन्त्रहरूमा ब्याजदर घट्ने अपेक्षा र लगानीकर्ताको ‘सेफ हेभेन’ खोजीले सुनचाँदीको माग बढाएको हो। अमेरिकी डलर कमजोर हुनु, मुद्रास्फीतिको डर र केन्द्रीय बैंकहरूले सुनको भण्डारण बढाउनु पनि मूल्य वृद्धिका प्रमुख कारण मानिन्छन्।

नेपालमा भने अन्तर्राष्ट्रिय मूल्यसँगै आयात निर्भरता, सीमित आपूर्ति र लगानी प्रयोजनका लागि बढ्दो मागले बजार प्रभावित पारेको छ। विवाहका लगन नजिकिँदै गर्दा सुनको माग बढ्ने अपेक्षा भए पनि अत्यधिक मूल्यका कारण उपभोक्ता खरिदमा भने संकुचन देखिन थालेको व्यवसायीहरू बताउँछन्।

यसरी विश्व बजारको उतारचढाव, लगानीकर्ताको मनोविज्ञान र स्थानीय माग र आपूर्तिको सन्तुलनले सुनचाँदीको मूल्य अझै अस्थिर रहने संकेत देखिएको छ। आगामी दिनमा विश्व आर्थिक अवस्थाको दिशाले नै सुनचाँदीको भाउमा हुने घटबढ निर्धारण गर्ने देखिन्छ।