कालिञ्चोकमा भीडभाड, खुलेको मौसमसँगै सप्ताहान्तको बिदामा घुम्ने थुप्रै (तस्बिर)

दोलखाको चर्चित धार्मिक तथा पर्यटकीय गन्तव्य कालिञ्चोकमा शनिबार आन्तरिक पर्यटकको ठूलो भीड लागेको छ। बिहानैदेखि काठमाडौं, भक्तपुर, ललितपुरसँगै चितवन, पोखरा र तराईका विभिन्न स्थानबाट आएका पर्यटक कालिन्चोकमा छन्।

उनीहरुले लामो लाइन बसेर केबुलकारको टिकट लिए। माथि पुगेर हिमाली दृश्य, चिसो मौसम र हिल–एड्भेन्चरको मजा लिएका छन्। यहाँ रहेको कालिञ्चोक भगवती मन्दिरमा पूजापाठ गर्न आउनेको पनि बाक्लो उपस्थितिले सडकमा पनि सवारीसाधनको चाप बढेको छ।

केबलकार लाइनमा समेत लामो प्रतीक्षा देखिएको छ भने होटल–लजहरू भरिएका छन्। धेरै पर्यटकले हिमाल र बगर–ढुंगा मिसिएको दृश्य, हावाको चिसो झोँका र हिमशृंखलाका दृश्यले आकर्षित गरेको बताए।

स्थानीय व्यवसायीहरूका अनुसार शनिबार मात्र सयौँ पर्यटक आएकाले होटल, रेस्टुरेन्ट र स्थानीय व्यापारमा सकारात्मक असर गरेको छ।

यात्रुको संख्या बढेसँगै सुरक्षा निकायले ट्रेकिङ मार्ग, केबलकार क्षेत्र र भीडभाड हुने स्थानमा विशेष व्यवस्था मिलाइएको छ। स्थानीय पर्यटन विकास समितिले जिम्मेवारीपूर्वक यात्रा गर्न र वातावरण संरक्षणमा ध्यान दिन आग्रह गरेको छ।

समुद्री सतहदेखि करिब ३,८०० मिटर उचाइमा रहेको कालिञ्चोकमा कालिञ्चोक भगवती मन्दिर मुख्य आकर्षण मानिन्छ। यहाँबाट रोलेवालिङ हिमाल, गोसाइँकुण्ड र आसपासका पहाडी दृश्य स्पष्ट देखिन्छन्। केबलकार, हिमाली हिँडाइ र सुन्दर सूर्योदयले यस क्षेत्रलाई अझ आकर्षक बनाएको छ।