वर्षासँगै महँगियो तरकारी, गोलभेंडा थोकमै किलोको ७५ रुपैयाँ, फलफूलको भाउ पनि उच्च

काठमाडौं। वर्षासँगै उपत्यकाको थोक बजारमा तरकारी र फलफूलको भाउ बढेको छ। थोकमै बढेपछि उपभोक्तालाई खुद्रा बजार अझ महँगो भएको छ। चाडबाडले तरकारी र फलफूलको नियमित आपूर्ति घटेको बजारमा वर्षासँगै ढुवानी प्रभावित हुनुको असर परेको छ।

अचानकको वर्षाले किसान धान जोगाउनतर्फ लाग्दा स्वदेशी बजारमा तरकारीको आपूर्ति परिमाण प्रभावित भएको छ। शनिबार कालीमाटी थोक बजारमा गोलभेंडा, मुला, जिरीको साग, अदुवा महँगिएको छ छ भने लोकल काउली, रातो मुला, तीते करेला, लौका, परवर सस्तिएका छन्।

कालीमाटी फलफूल तथा तरकारी बजार विकास समितिका अनुसार अघिल्लो दिनका तुलनामा १५ रुपैयाँ घटेर लौका किलोको ६३ रुपैयाँ भएको छ। ५ रुपैयाँ घटेर परवर किलोको ७५, चिचिन्डो १० रुपैयाँ घटेर ५५, घिरौंला १४ रुपैयाँ ५० पैसा घटेर ६८ र सलगम २० रुपैयाँ घटेर ८५ रुपैयाँ भएको छ।

भिन्डी किलोको ९५, बरेला ४७, चमसुरको साग २५०, तोरीको साग ८५, कुरिलो ५२५, सजिवन २४०, लोकल गाजर १२५, तराई गाजर १०५ र हाइब्रिड घिउ सिमी प्रति किलो ८० रुपैयाँमा मूल्य स्थिर छ।

बजारमा शनिबार थोकमा लोकल ठूलो गोलभेंडा छैन। ठूलो भारतीय गोलभेंडा ५ रुपैयाँ बढेर किलोको ७५ रुपैयाँ पुगेको छ। सानो लोकल गोलभेंडा २५ पैसा घटेर किलोको ७२ रुपैयाँ ७५ पैसा हुँदा सानो टनेल गोलभेंडा ८७ रुपैयाँ ६० पैसाबाट बढेर ९१ रुपैयाँ ४० पैसा भएको छ।

रातो आलु ३ रुपैयाँ ७५ पैसा घटेर किलोको ८३ रुपैयाँ भएको छ। रातो भारतीय आलु भने किलोको ४६ रुपैयाँ ५० पैसाबाट बढेर ५१ रुपैयाँ २५ पैसा भएको छ। सेतो आलु किलोको ६३ रुपैयाँ ८० पैसाबाट घटेर ६१ रुपैयाँ २० पैसा भएको छ।

सुकेको प्याज किलोको ३९.४० बाट घटेर ३८.८० हुँदा हरियो प्याज ३२ रुपैयाँ घटेर १४३ रुपैयाँ भएको छ। शुक्रबार हरियो प्याज प्रति किलो १७५ रुपैयाँमा खरिदबिक्री भएको थियो।

फलफूलमा फुजी स्याउ १० रुपैयाँ बढेर किलोको २८५, केरा १३ रुपैयाँ बढेर दर्जनको १३३, नेपाली सुन्तला २ रुपैयाँ बढेर किलोको ९७, तरबुजा १० रुपैयाँ बढेर ७५ रुपैयाँ भएको छ। शुक्रबार किलोको २१२ रुपैयाँ ५० पैसा रहेको जुनार शनिबार बढेर २४० रुपैयाँ पुगेको छ।

यस्तो छ आजको भाउ