आसामले नेपाल ‘ए’लाई दियो १ सय ९१ रनको लक्ष्य, आकाशले लिए ३ विकेट

काठमाडौं। नेपाल ‘ए’ टोलीले आसामबाट १ सय ९१ रनको लक्ष्य पाएको छ। भारतको गुवाटीमा जारी टी-२० सिरिजको पहिलो खेलमा आसाम स्टेट टिमले सुरुवाती ब्याटिङ गर्दै निर्धारित २० ओभरमा ८ विकेट गुमाउँदै १९० रन बनाएको हो।

टस हारेर ब्याटिङमा उत्रिएको आसामका लागि कप्तान सुमित घडीगओनकारले सर्वाधिक ३४ रन बनाउँदा अविभन चौधरीले अविजित २६ रनको योगदान दिए।

आक्रामक ब्याटिङ गरेका चौधरीले ७ बल फेस गर्दा ४ वटामा छक्का प्रहार गरेका थिए। त्यस्तै, रोहित सेन र आकाश सेनगुप्ताले समान २४ रन बनाए।

बलिङतर्फ नेपालका आकाश चन्दले सर्वाधिक ३ विकेट लिँदा विवेक यादव र कमलसिंह ऐरीले समान २ विकेट लिए। त्यस्तै, मोहम्मद आदिल आलमले १ विकेट लिए।

नेपाल जवाफी ब्याटिङका लागि मैदानमा उत्रिएको छ।

आजै नेपाली सिनियर टोली साउथ अस्ट्रेलियाविरुद्धको दोस्रो खेलमा १६१ रनको लक्ष्य पछ्याएर ब्याटिङ गरिरहेको छ।