बैंकहरुको ब्यालेन्स सिटले देखायो सुधारको संकेत, ऋण असुली राम्रो हुँदा लाभांश क्षमता दोहोरो अंकमा

काठमाडौं। बैंकहरुको वित्तीय विवरणले अर्थतन्त्रमा सुधारको संकेत गरेको छ। ऋण असुलीमा सुधार हुँदा आर्थिक वर्ष २०८१/८२ मा वाणिज्य बैंकहरुको नाफा ४३.३० प्रतिशतले वृद्धि भएको छ।

वाणिज्य बैंकहरुले गत आर्थिक वर्ष ७१ अर्ब ६२ करोड रुपैयाँ खुद नाफा कमाएका हुन्। अघिल्लो वर्ष बैंकहरुले ४९ अर्ब ९८ करोड रुपैयाँ नाफा गरेका थिए।

ऋण असुली सुधार भइ प्रोभिजनिङ घट्दा बैंकहरुको नाफा बढेको हो। नाफा बढेसँगै वितरणयोग्य मुनाफामा पनि सुधार भएको छ। गत आर्थिक वर्षको वितरणयोग्य मुनाफा हेर्दा वाणिज्य बैंकहरुको औसत लाभांश क्षमता १३.११ प्रतिशत देखिन्छ।

वितरणयोग्य नाफा १९ अर्ब ७७ करोड रुपैयाँ छ। जबकि अघिल्लो वर्ष यो रकम ७ अर्ब २४ करोडले ऋणात्मक थियो।

कर्जा असुलीमा सुधार हुँदा कर्जा नोक्सानीबापतको रकम घटेको छ। बैंकहरुले अघिल्लो वर्ष २३ अर्ब ४८ करोड प्रोभिजनिङ गरेकामा यो रकम गत आर्थिक वर्ष १७ अर्ब ४८ करोडमा झरेको छ।

१६ वटा वाणिज्य बैंकले नाफा बढाउँदा ४ बैंकको भने खुम्चिएको छ। वाणिज्य बैंकहरुको ब्याज आम्दानी भने थोरै घटेको छ। अघिल्लो वर्षको तुलनामा गत वर्ष वाणिज्य बैंकहरुको ब्याज आम्दानी ३० करोडले घटेको हो।

त्यसैगरी, वाणिज्य बैंकहरुको औसत खराब कर्जा अनुपात ०.४४ प्रतिशतले बढेको छ। अघिल्लो वर्ष ३.७३ प्रतशित रहेको खराब कर्जा बढेर ४.१७ प्रतिशत पुगेको छ।

ऋण असुलीमा सुधार र नीतिगत लचकताले रिपोर्ट सकारात्मक भएको बैंकरहरु बताउँछन्।

एभरेष्ट बैंकका प्रमुख कार्यकारी अधिकृत (सीइओ) सुदेश खालिङ ऋण असुलीमा सुधार र राष्ट्र बैंकको सहुलियतले बैंकहरुलाई नाफा बढाउन ‘सपोर्ट’ गरेको बताउँछन्।

‘ऋण असुलीमा विस्तारै सुधार भइरहेको छ। राष्ट्र बैंकले कृषि र एसएमइ क्षेत्रको कर्जालाई पुनर्संरचनाको सुविधा दियो,’ उनले भने, ‘सुधार भइरहेको बेलामा राष्ट्र बैंकको सुविधाले थप काम गरेको छ।’

गभर्नर डा. विश्व पौडेलले घोषणा गरेको बैंक तथा वित्तीय संस्थाहरुलाई कर्जा पुनर्संरचनाको सुविधाले नाफा बढाउन सहयोग गरेको देखिन्छ। गत जेठमा गभर्नर पौडेलले कृषि र एसएमई क्षेत्रमा गएको कर्जा पुनर्संरचनाको सुविधा दिएका थिए।

साथै, राष्ट्र बैंकले असल वर्गमा वर्गिकरण गरिएको कर्जाको नोक्सानी घटाउँदा त्यसले प्रोभिनजिङ कम भइ नाफा बढाउन सहयोग पुगेको हो।

सात सूचकमा कुन बैंक कति अब्बल?