स्पेसएक्सबाट ४ यात्री उडानको १५ घण्टामै अन्तरिक्ष स्टेशनमा, पुरानो टोली फर्कने

केप क्यानाभेरल, (फ्लोरिडा)- स्पेसएक्सले शनिबार नयाँ टोलीलाई अन्तर्राष्ट्रिय अन्तरिक्ष स्टेसनमा पुर्‍याएको छ। टोलीले पृथ्वीबाट उक्त स्टेसनसम्म केवल १५ घण्टामा यात्रा पूरा गरेको छ।

चार अमेरिकी, रूसी र जापानी अन्तरिक्ष यात्रीहरू नासाको केनेडी स्पेस सेन्टरबाट प्रक्षेपणपछि स्पेसएक्सको क्याप्सुलमार्फत पुगे। उनीहरूले कम्तीमा ६ महिना कक्षीय प्रयोगशालामा बिताउनेछन् र मार्चदेखि त्यहाँ रहेका सहकर्मीहरूसँग ठाउँ अदलीबदली गर्नेछन्। स्पेसएक्सले अघिल्लो टोलीका चार जनालाई छिट्टै फर्काउने योजना बनाएको छ।

नयाँ टोलीका सदस्यमा नासाका जेना कार्डम्यान र माइक फिन्के, जापानका किमिया युई र रूसका ओलेग प्लाटोनोभ टोलीमा छन्। जो सबै प्रारम्भमा अन्य मिसनका लागि तोकिएका थिए। क्याप्सुल दक्षिण प्रशान्त माथि डक भएपछि फिन्केले रेडियोमार्फत भने, ‘हेलो, स्पेस स्टेसन !’

कार्डम्यान र अर्का एक अन्तरिक्ष यात्रीलाई गत वर्षको स्पेसएक्स उडानबाट हटाइएको थियो ताकि नासाका दुई फसेका अन्तरिक्ष यात्रीहरू बोइङ स्टारलाइनर परीक्षण पाइलट बुट्च विलमोर र सुनी विलियम्सका लागि ठाउँ मिलाउन सकियोस्। तिनीहरूको अन्तरिक्ष स्टेशन बसाइँ एक साताबाट बढेर नौ महिनाभन्दा बढी भएको थियो।

फिन्के र युई अर्को स्टारलाइनर मिसनका लागि तालिम लिइरहेका थिए। तर थ्रस्टर र अन्य समस्याका कारण स्टारलाइनर २०२६ सम्म ग्राउन्डेड भएकाले उनीहरूले स्पेसएक्समा स्विच गरे। प्लाटोनोभलाई केही वर्षअघि एक अज्ञात रोगका कारण सोयुज प्रक्षेपण सूचीबाट हटाइएको थियो।

नयाँ टोलीको आगमनले अस्थायी रूपमा अन्तरिक्ष स्टेसनको जनसंख्या ११ पुगेको छ। ‘पहिलो पटक हाम्रो दृष्टिमा अन्तरिक्ष स्टेसन देख्दा कत्तिको अविश्वसनीय सुन्दर दृश्य थियो,’ बोर्डमा पुगेपछि कार्डम्यानले भने।

अमेरिकी मापदण्डअनुसार उनीहरूको ‘ट्याक्सी’ उडान तीव्र भए पनि, अन्तरिक्ष स्टेशनमा पुग्ने सबैभन्दा छिटो यात्राको रेकर्ड रसियनसँग छ, जसले केवल तीन घण्टामा यात्रा पूरा गरेका थिए। (एपी)