कावासोती निवासी सीता जिसीको कौसीमा ड्रागन फल खेती, वार्षिक ८ लाखसम्म आम्दानी

नवलपरासी। यहाँको नवलपरासी (बर्दघाट सुस्तापूर्व) नवलपुरको कावासोती-९ निवासी सीता जिसी राउतले कौसीमा ड्रागन फल खेती गरेर वार्षिक ८ लाख रुपैयाँसम्म आम्दानी लिने गरेकी छन्।

३ वटा बिरुवाबाट कौसीमा सुरुआत गरेको सो खेती हाल १३५ वटा गमलामा विस्तार भएको छ। उनले बारीमा ४२४ वटा बोट रोपेकी छन्। घरमै खान भनेर ४ वर्ष पहिले सुरु गरेको खेती अहिले व्यावसायिक बनेको हो।

‘युट्युब’बाट हेरेर प्रभावित भई उनले कौसीमा ड्रागन फल खेती सुरुआत गरेकी थिइन्। सुरुमा मलेसियन सी भेराइटीको ३ वटा बिरुवा २ हजार १ सय रुपैयाँमा पनौतीबाट ल्याएर लगाएकी थिइन्।

कौसीमा खेती सुरु गर्दा २५ हजार रुपैयाँ लगानी लागेको उनले बताइन्। उनले फल मात्र होइन बिरुवा पनि बिक्री गरेर आम्दानी लिँदै आएकी छन्।

‘मैले सुरुमा आफ्नै लागि बिरुवा तयार गरेर लगाएँ, त्यसले राम्रो फल दियो, बिरुवा सफल भएपछि मैले बिरुवा बिक्री गर्न थालेँ, अहिले मकहाँ धेरैजना बिरुवा लिन आउनुहुन्छ। यसपालि करिब २ लाख रुपैयाँको त बिरुवा नै बेचेँ,’ जिसीले भनिन्।

गत असार पहिलो सातादेखि उत्पादन सुरु भएकामा ३ लट बिक्री गरी हाल चौथो लट टिप्न थालेकी छन्। असार महिनामा मात्रै साढे ३ क्वीन्टल ड्रागन फल बिक्री गरिसकेकी छन् उनले।

बजारका लागि कुनै समस्या नभएको उनको भनाइ छ। स्थानीय बजार र मुख्य सहरहरू नारायणगढ, काठमाडौंदेखि बुटवलसम्म उनले बिक्री गर्दै आएकी छन्।

पानी ट्याङ्की राखेका फलामका डण्डी, छतमा प्रयोग भएको रेलिङले नै पिल्लरको काम गर्ने हुँदा कौसीमा लगानी कम लाग्ने, पात नहुँदा झरेर फोहोर हुने पिर नहुने, अनि धेरै घाम र थोरै पानी भए पुग्ने भएकाले, कौसी खेतीका लागि ड्रागन फ्रुट खेती एकदमै उपयुक्त रहको जिसीको अनुभव छ। रासस