काँकडभिट्टाबाट ११ महिनामा भित्रियो १८ अर्बको पेट्रोलियम पदार्थ, पोहोरभन्दा कम

काठमाडौं । चालु आर्थिक वर्ष २०८१/८२ को ११ महिनामा पूर्वीनाका काँकडभिट्टाबाट १८ अर्ब ४ करोड ६० लाख मूल्य बराबरको पेट्रोलियम पदार्थ आयात भएको छ।

पूर्वीनाकाबाट पेट्रोल, डिजेल, एलपी ग्यास, एटीएफ, मट्टितेल आयात भएको हो। मेची भन्सार कार्यालयका सूचना अधिकारी एवं भन्सार अधिकृत ईश्वरकुमार हुमागाईँका अनुसार गत आर्थिक वर्षको सोही अवधिको तुलनामा १ अर्ब ६ करोड ४३ लाख अर्थात् ५.६० प्रतिशतले पेट्रोलियम पदार्थ आयातमा गिरावट आएको छ।

आयात घटे पनि पेट्रोलियम पदार्थबाट प्राप्त राजस्व भने ५.७० प्रतिशत अर्थात् ४७ करोड ४३ लाख ८७ हजारले बढेको छ। कार्यालयको तथ्यांक अनुसार चालु आर्थिक वर्षको ११ महिनामा पेट्रोलियम पदार्थ आयातबाट ८ अर्ब ७८ करोड २७ लाख ७२ हजार राजस्व संकलन भएको छ।

उक्त अवधिमा ८ अर्ब ११ करोड ५९ लाख मूल्य पर्ने ९३ हजार ८२४ किलोलिटर पेट्रोल आयात भएको थियो। यसैगरी ६ अर्ब २६ करोड ७१ लाख मूल्य पर्ने ६८ हजार ८२० किलोलिटर डिजेल आयात भएको छ।

त्यसैगरी, सोही अवधिमा २ अर्ब ५९ करोड मूल्य पर्ने २३ हजार ४३८ मेट्रिक टन एलपी ग्यास, ६१ करोड २० लाख मूल्य पर्नेछ हजार ७०८ किलोलिटर एटीएफ र २२ करोड ७१ लाख मूल्य पर्ने दुई हजार ५२० किलोलिटर मट्टितेल आयात भएको छ। रासस