प्रतिनिधिसभामा अमरेशकुमारको विवादास्पद अभिव्यक्ति, सभामुखले हटाउन दिए निर्देशन

काठमाडौं । सभामुख देवराज घिमिरेले सांसद अमरेशकुमार सिंहले संसदमा राखेको अभिव्यक्ति हटाउन निर्देशन दिएका छन्।

आजको बैठकमा घिमिरेले ‘पाँच वटा जिल्लाबाहेक अरु जिल्ला भाडामा दिए हुन्छ’ भन्ने अभिव्यक्ति दिएका थिए। घिमिरेले संसद्को अभिलेखबाट सो अभिव्यक्ति हटाउन निर्देशन दिएका हुन्।

सभामुख घिमिरेले खर्च कटौतीको प्रस्तावसहित विनियोजन विधेयकको आजका लागि तोकिएका शीर्षकमा बोल्न सांसद सिंहलाई समय दिएका थिए। त्यसक्रममा सिंहले बढी बजेट पाँच वटा जिल्लामा दिइएकाले तीबाहेकका जिल्ला अरु देशलाई भाडामा दिए हुने अभिव्यक्ति दिएका थिए।

सांसद सिंहको अभिव्यक्तिमा नेपाल कम्युनिष्ट पार्टी (एमाले) का मुख्य सचेतक महेश बर्तौलाले प्रतिनिधिसभा नियमावली २०७९ को नियम २०, २१ र २३ बमोजिम नियमापत्ति जनाएका थिए। सिंहले राष्ट्रघाती अभिव्यक्ति दिएको मुख्य सचेतक बर्तौलाले बताएका थिए।

सांसद सिंहले बोलिरहँदा पटकपटक सभामुख घिमिरेले संसदीय भाषा प्रयोग गर्न निर्देशन दिएका थिए।