‘टेक एण्ड पे’ फिर्ता लिन ऊर्जा उद्यमीहरुले सरकारलाई पठाए एकैपटक एसएमएस

काठमाडौं। सरकारले बजेटमा ल्याएको विद्युत खरिद सम्झौतामा ‘टेक एण्डे पे’ (लेउ र तिर) प्रावधान फिर्ता लिन ऊर्जा उद्यमी आन्दलित छन्। उनीहरुले प्रधानमन्त्री, अर्थमन्त्री र ऊर्जामन्त्री र नेपाल विद्युत प्राधिकरणका कार्यकारी निर्देशकलाई एकैपटक एसएमएस पठाएका छन्।

आन्दोलनका कार्यक्रम अन्तर्गत शनिबार बिहान १० बजे एकैपटक प्रधानमन्त्री केपी शर्मा ओली, उपप्रधान एवं अर्थमन्त्री विष्णु पौडेल, ऊर्जामन्त्री दीपक खड्का र विद्युत प्राधिकरणका कार्यकारी निर्देशक हितेन्द्रदेव शाक्यलाई ऊर्जाउद्यमीहरुले ‘टेक एण्ड पे’ फिर्ता लिन एसएमएस गरेका हुन्।

टेक एण्ड पे पीपीएको व्यवस्था ऊर्जामा निजी क्षेत्रको लगानी बन्द गर्नेगरी ल्याइएको भन्दै उनीहरुले एसएमएसमा “ऊर्जामा निजी क्षेत्र समाप्त पार्ने, लोडसेडिङ निम्त्याउने, लगानीकर्तालाई डुबाउने र देशको अर्थतन्त्र सिध्याउने टेक एण्ड पे पीपीए खारेज गर’ उल्लेख गरेका छन्।

सरकारले गत जेठ १५ गते सार्वजनिक गरेको आगामी आर्थिक वर्षको बजेटमा निजी क्षेत्रले निर्माण गर्ने नदी प्रवाहमा आधारित (आरओआर) जलविद्युत आयोजनाको विद्युत खरिद सम्झौता (पीपीए) टेक एण्ड पे अवधारणा अनुसार मात्र गरिने उल्लेख गरेको छ। त्यस्तो उल्ले गरेदेखि नै उद्यमीहरुले त्यसको विरोध गर्दै आइरहेकोमा शुक्रबारदेखि चरणबद्ध आन्दोलन गर्दैछन्।

ऊर्जा उत्पादकहरुको छाता संस्था स्वतन्त्र ऊर्जा उत्पादकहरुको संस्था, नेपाल (इप्पान)का कार्यबाहक अध्यक्ष एवं इप्पान आन्दोलन समितिका संयोजक मोहनकुमार डाँगीले ‘टेक एण्ड पे फिर्ता’ लिन सरकारलाई दबाब दिन एकैपटक एसएमएस गरिएको बताए।

डाँगी नेतृत्वको आन्दोलन समितिले आन्दोलनको पहिलो दिन प्रधानमन्त्री केपी शर्मा ओलीलालाई भेटेर ज्ञापनपत्र बुझाइएको थियो भने आन्दोलनको तेस्रो दिन आइतबार बिहान ११ बजे सामाजिक सञ्जालमा सबैले एकैपटक ‘टेक एण्ड पे पीपीए हटाउन’ सन्देश लेखेर दबाब दिने कार्यक्रम छ।