आप्रवासी लक्षित छापा मार्दा लस एन्जलसमा भड्कियो हिंसा, ट्रम्पले पठाए नेशनल गार्ड

अमेरिकाको लस एन्जलसमा अहिले प्रहरी र प्रदर्शनकारीबीच झडप भइरहेको छ। गैरकानुनी रुपमा अमेरिकामा बसिरहेकाहरुलाई लक्षित गरेर छापा हानेको विषयमा प्रदर्शन उग्र बनेको हो।

ल्याटिनो जिल्लामा प्रदर्शनकारी र प्रहरीबीच झडप भइरहेको छ। अध्यागमन विभागका कर्मचारीहरुले आप्रवासी लक्षित छापा मार्दा प्रदर्शनकारीहरु तोडफोड र आगजनीमा उत्रिएका हुन्।

प्रदर्शन नियन्त्रण बाहिर जाने अवस्था देखिएको भन्दै अमेरिकी राष्ट्रपति डोनाल्ड ट्रम्पले नेशनल गार्डलाई लस एन्जलस पठाएका छन्। करिब २ हजार नेशनल गार्डलाई प्रदर्शन भइरहेको क्षेत्रमा पठाइएको छ।

प्रदर्शनकारीहरुले निजी सवारीमा आगजनी गरिरहेका छन्। लस एन्जलस प्रहरीले धेरै प्रदर्शनकारीलाई नियन्त्रणमा लिएको जनाएको छ।