‘धेरै नर्वेलीले इलन मस्कलाई मन नपराए पनि टेस्ला चढ्न कुनै हिचकिचाहट मान्दैन’

काठमाडौं । पछिल्लो समय युरोपका अधिकांश देशहरुमा टेस्ला गाडीको बिक्रीमा गिरावट देखिएको छ। तर, नर्वेमा भने टेस्लाको माग बढेको देखिएको छ।

सोमबार सार्वजनिक भएको उद्योगसम्बन्धी तथ्यांकले नर्वेली उपभोक्ताहरु टेस्लाप्रति पुनः आकर्षित भएको देखिएको हो। यो प्रवृत्ति परिवर्तन हुनुको मुख्य कारण कम्पनीले शून्य ब्याजदरमा सवारी कर्जा उपलब्ध गराउनु र नयाँ मोडेल ‘वाई’ बजारमा ल्याउनु रहेको बताइएको छ। यो मोडेल पछिल्ला तीन महिनादेखि नर्वेमा सबैभन्दा धेरै बिक्री भएको गाडी बनेको छ।

नर्वे विद्युतीय सवारी साधनको प्रयोगमा विश्वमै अगाडि रहेको देश हो। नर्वेली सडक महासंघ (ओएफभी) का अनुसार मे महिनामा नर्वेमा दर्ता भएका नयाँ गाडीमध्ये ९३.९ प्रतिशत विद्युतीय थिए। यस वर्षको पहिलो पाँच महिनामा यो अनुपात ९२.७ प्रतिशत रहेको छ।

मे महिनामा टेस्लाले नर्वेमा सबैभन्दा धेरै गाडी बिक्री गर्ने कम्पनीको उपाधि पुनः प्राप्त गरेको छ। सो महिनामा टेस्लाको बिक्री तीन गुणाले बढेर कुल नयाँ गाडीको १८.२ प्रतिशत पुगेको हो।

यद्यपि, वर्षको पहिलो ५ महिनामा टेस्लाको कुल बिक्री ८.३ प्रतिशत मात्र बढेको छ, जुन समग्र गाडी बजारको ३०.६ प्रतिशत वृद्धिको तुलनामा कम हो। सो अवधिमा टेस्लाको बजार हिस्सा १२.९ प्रतिशत रहेको छ, जसले यसलाई जर्मन कम्पनी भोल्क्सवागनपछि दोस्रो स्थानमा राखेको छ।

युरोपेली संघभित्र भने अप्रिल महिनामा टेस्लाको बिक्री आधा घटेको थियो। त्यहाँ टेस्लाको बजार हिस्सा घटेर १.१ प्रतिशतमा झरेको देखिन्छ। यसको कारण चिनियाँ गाडी कम्पनीहरूको तीव्र प्रतिस्पर्धा र केही उपभोक्ताहरूले कम्पनीका मालिक इलन मस्कको राजनीतिक विचार तथा अमेरिकाका राष्ट्रपति डोनाल्ड ट्रम्पसँगको सम्बन्धप्रति असन्तुष्टि देखाउनु हो भनिएको छ।

ओएफभीका निर्देशक ओइभिन्ड सोलबर्ग थोर्सेनले भने,’नर्वेमा टेस्लाको बिक्री अवस्थाले अन्य युरोपेली मुलुकहरूको तुलनामा फरक र विशेष स्थिति देखाउँछ, जहाँ यसको माग घट्दो क्रममा छ।’

प्रयोग गरिएको गाडी व्यवसायमा आवद्ध विश्लेषक जोनाथन पारले भने,’नर्वेली उपभोक्ताका लागि मूल्य सबैभन्दा महत्वपूर्ण कुरा हो। धेरै नर्वेलीहरू इलन मस्कलाई मन नपराए पनि टेस्ला चढ्न कुनै हिचकिचाहट मान्दैन।’

यद्यपि, केही नर्वेली सञ्चारमाध्यमहरूले पछिल्ला महिनाहरूमा केही टेस्ला प्रयोगकर्ताहरूले आफ्नो गाडी बेच्न थालेको र भविष्यमा टेस्ला नकिन्ने निर्णय लिएको समाचार प्रकाशित गरेका छन्। रासस