महँगी भत्तामा सरकारलाई थपियो १० अर्बको भार, छुट्याइयो १७ अर्ब १ करोड रुपैयाँ

काठमाडौं। सरकारले बजेटमार्फत तलब बढाउने कर्मचारीको विश्वास थियो। तर, अर्थमन्त्री विष्णु पौडेलले स्रोतमा चाप देखाएर तलब बढाएनन्। उनले तलबको साटो भत्ता थपेका छन्।

कर्मचारीको महँगी भत्ता मासिक २ हजारबाट ५ हजार रुपैयाँ पुर्‍याइएको छ। तलब बढाउँदा ग्रेडमा भारदेखि कर्मचारी सञ्चय कोषमा जम्मा गर्नुपर्ने रकम र पेन्सनमा भार बढ्छ। त्यही कारण अर्थमन्त्रीले चलाखी अपनाउँदै भत्ता बढाएका हुन्।

भत्ता वृद्धिको निर्णयले सरकारलाई १० अर्ब रुपैयाँको भार थपिएको छ। चालु आर्थिक वर्ष महँगी भत्ता शीर्षकमा ७ अर्ब १ करोड ५७ लाख लाख रुपैयाँ छुट्याइएकामा आगामी आर्थिक वर्षका लागि यो शीर्षकमा १७ अर्ब १ करोड १५ लाख रुपैयाँ विनियोजन गरिएको छ।