जगदुल्लाको ठेक्का लिन फर्जी कागजात पेस गरेको पुष्टि, ऊर्जामन्त्रीको प्लटमा सीइओ सापकोटा !

काठमाडौं। जगदुल्ला जलविद्युत आयोजनाको ठेक्का पार्न चिनियाँ कम्पनी जियाङ्सी कन्स्ट्रक्सन इन्जिनियरिङ कर्पोरेसन(जेसीई)ले फर्जी डकुमेन्ट पेस गरेको पुष्टि भएको छ।

१०६ मेगावाट क्षमताको यो आयोजनाको ठेक्का लिन जेसीई/एएनकेले जलविद्युत आयोजना निर्माणको अनुभव पुर्‍याउन एक चिनियाँ कम्पनीको नक्कली कागजात बनाएको खुलेको हो। जेसीईले हेजाउ साङचेङ इलेक्ट्रिक पावर कम्पनीसँग मिलेर चीनमा ९० मेगावाटको जलविद्युत आयोजना निर्माण गरेको कागजात पेस गरेको थियो।

तर, हेजाउले केही दिनअघि जगदुल्ला हाइड्रो कम्पनीलाई आफ्नो कम्पनीको नाम र छाप नक्कल गरी अनधिकृत रुपमा प्रयोग गरिएको पत्र पठाएपछि जेसीईले फर्जी डकुमेन्ट बनाएको खुलेको हो। चीनमा ९० मेगावाटको साङचेङ हाइड्रोपावर प्रोजेक्ट बनाएको अनुभव जेसीईले पेस गरेको थियो।

तर, हेजाउले आर्थिक कारणले धेरै अघि नै साङचेङ हाइड्रोपावर आयोजना रद्द भएको र निर्माण प्रक्रियामै नगएको स्पस्ट पारेको छ।

‘हाम्रो कम्पनीको छाप नक्कल गरेर अवैधरुपमा कागजात पेस गरेको थाहा पाएका छौं,’ हेजाउले जगदुल्ला हाइड्रोपावर कम्पनीका प्रमुख कार्यकारी अधिकृत सञ्जय सापकोटालाई सम्बोधन गर्दै लेखेको पत्रमा भनिएको छ, ‘यस्ता अवैध, अपराधिक कार्य तत्काल रोक्न आग्रह गर्दछौं। यस्ता गैरकानुनी कार्यमा संलग्न पक्षलाई कानुनी कारवाहीको दायरामा ल्याउने अधिकार सुरक्षित छ।’

फर्जी डकुमेन्ट प्रयोग भएको खुलेसँगै ऊर्जामन्त्री दीपक खड्का र जगदुल्ला हाइड्रोपावर कम्पनीका सीइओ सापकोटा समेत यो प्रकरणमा तानिएका छन्।

जेसीईले नक्कली कागजात पेस गरेको उजुरी सार्वजनिक खरिद अनुगमन कार्यालयदेखि अख्तियार दुरुपयोग अनुसन्धान आयोगसम्म पर्दा पनि सीइओ सापकोटाले टेण्डर प्रक्रियालाई निरन्तर अगाडि बढाएका थिए। स्रोतका अनुसार चिनियाँ कम्पनी जेसीई र नेपाली कम्पनी एएनकेलाई ठेक्का दिलाउन मन्त्री खड्काले तयार पारेको प्लटमा सापकोटा समेत सामेल भएका थिए।

जेसीईले नक्कली कागजात पेस गरेको जान्दाजान्दै ठेक्का प्रक्रिया अगाडि बढाउनुले सापकोटाको समेत मिलेमतो रहेको स्रोतको दाबी छ।

‘जगदुल्लाको पहिलो ठेक्कामा चेक लेनदेन गरेर सेटिङपछि मन्त्री खड्कालाई जोगाउन सापकोटा सञ्चारमाध्यममा अन्तर्वार्ता दिँदै हिंडेका थिए। अहिले नक्कली कागजात बनाएको थाहा पाएर पनि टेण्डर प्रक्रिया नरोक्नुले उनी सामेल भएको स्पस्ट हुन्छ,’ ऊर्जा मन्त्रालयका एक कर्मचारीले बिजमाण्डूसँग भने,’फर्जी कागजातकै विषय आएपछि अख्तियारले राम्रो अनुसन्धान गरेर सत्यतथ्य बाहिर ल्याउनुपर्छ। र, दोषीलाई कठघरामा उभ्याउनुपर्छ।’

तर, सापकोटाले पत्रको आधिकारिकता बारेमा अध्ययन गरिरहेको भन्दै दिएर उम्कने प्रयास गरिरहेका छन्। ‘हामीलाई पत्र प्राप्त भएको छ। त्यो पत्र सम्बन्धित कम्पनीले पठाएको हो वा होइन?, पत्र आधिकारिक हो/होइन भनेर फ्याक्ट चेक गर्नुपर्ने देखियो। अहिले हामीले अध्ययन गरिरहेका छौं,’ उनले भने,‘ सीआइबीले पनि अध्ययन गरिरहेको छ। त्यसले पनि यो पत्र आधिकारिक हो वा होइन भनेर हेर्ला। उसले पनि रिपोर्ट दिन्छ।’

जगदुल्ला आयोजना निर्माणका लागि आवेदन दिएका ४ कम्पनीमध्ये सिनो हाइड्रो पावर र जेसीइ/एएनके जेभी सर्टलिस्टमा परेका थिए। त्यसलगतै सिनो हाइड्रोपावरले जलविद्युत आयोजना नै नबनाएको र योग्यता नै नपुगेको कम्पनी सर्ट लिस्टमा परेको भन्दै जेसीई/एएनकेविरुद्ध सार्वजनिक खरिद अनुगमन कार्यालयमा उजुरी दिएको थियो।