चितवनमा डेरीको बक्यौता ८० करोड, ‘किसानले भुक्तानी माग्दा दूध उठाउनै घटाउँछन्’

चितवन। सरकारी संस्था डीडीसीसँगै विभिन्न डेरीले लामो समय भुक्तानी बक्यौता राख्दा दुग्ध संकलक सहकारी संकटमा परेका छन्। जिल्लाका केही सहकारीहरुले डेरीहरुलाई दूध नपठाउने चेतावनी दिएका छन्।

भुक्तानीका लागि दबाब दिन चितवनका दुग्ध सहकारी संस्थाहरुले चेतावनी दिएका हुन्। चितवन जिल्ला दुग्ध उत्पादक सहकारी संघका अध्यक्ष किशोर बगालेले भने, ‘अहिले भुक्तानी माग गरेका सहकारीहरुबाट दूध उठ्न कठिन भएको छ।’

यहाँ उत्पादित दूध सरकारको स्वामित्वमा रहेको दुग्ध विकास संस्थान (डिडिसि) र निजी कम्पनीले लैजाने गरेका छन्। उनका अनुसार जिल्लाका दुग्ध सहकारीहरुले विभिन्न डेरीहरुबाट ८० करोड रुपैयाँभन्दा बढी भुक्तानी पाउन बाँकी छ। उक्त रकममा डीडीसीको ३५ करोडभन्दा बढी छ भने अन्य रकम निजी डेरीहरुको हो।

अध्यक्ष बगालेका अनुसार जिल्लाबाट ४० भन्दा बढी डेरीले दूध लैजाने गरेका छन्। ती डेरीहरुले भुक्तानी माग्दा दूध लैजान कम गर्ने गरेका हुन्। उनले भने, ‘किसानले भुक्तानी माग्दा दूध उठाउन कम गर्छन्।’ कतिपय डेरीहरुले नियमित लैजाने दूधबाट कटौती गरेर थोरै लैजान थालेको उनले जानकारी दिनुभयो।

गत पुस १ गतेदेखिको भुक्तानी लिन बाँकी छ। यस्तै अवस्था आए दुग्ध उत्पादक किसान आन्दोलनमा आउन बाध्य हुने उनले बताए। जिल्लाबाट दैनिक १ लाख ५१ हजार लिटर दूध बाहिर जाने गरेको संघले जनाएको छ। जसमध्ये ३५ हजार लिटर दूध डीडीसीले लाने गरेको छ।

अहिले जिल्लामा दैनिक करिब ३ लाख लिटर दूध उत्पादन हुँदै आएको छ। किसानको भुक्तानी दिन ढिला गरे पछि संघले स्थानीय प्रशासनलाई भुक्तानीका लागि सहजीकरण गन आग्रह गरेका छन्।

किसानको समस्या समाधानका स्थानीय प्रशासन समन्वय गर्न तयार रहेको प्रमुख जिल्ला अधिकारी प्रकाश पौडेलले बताए। भुक्तानी दिन ढिला गर्ने उद्योगलाई सम्पर्क गरेर बोलाएर छलफल गरिने उनले प्रष्ट पारे। यस विषयमा गृह मन्त्रालय र कृषि मन्त्रालयसँग आफूले समन्वय गर्ने उनको भनाइ छ। रासस