स्टारडमको छायाबाहिर लभर ब्वाई, ‘कलाकार फरक फरक पात्रमा रम्नुपर्छ’

काठमाडौं। नेपाली फिल्ममा ‘लभर ब्वाई’ को भूमिकामा रुचाइएका अभिनेतामध्ये एक हुन् आर्यन सिग्देल। ‘किस्मत’ बाट अभिनयको सुरुआत गरेका उनले प्रेम कथानक फिल्ममा धेरैजसो भूमिका खेलेका छन्।

दर्शकले सिग्देलको यस्तै अभिनय रुचाएपछि होला निर्माता र निर्देशकले पनि एकै प्रकारको भूमिका प्रस्ताव गरेको। यद्यपि उनी आफूलाई एकै भूमिकामा सीमित गर्न चाहदैनन्। त्यसैले नै उनले ‘होमवर्क’ मा दोहोरो भूमिका निर्वाह गरे। जसमा बाबुको भूमिकामा देखापर्दा धेरै दर्शकले उनलाई चिनेनन्। त्यसपछि ‘नाइके’ मा द्वन्द्व प्रधान भूमिका गरे।

आफ्नो ‘लभर ब्वाई’ को छवि मेट्न उनी दुवै फिल्मबाट असफल भए। ‘मैले आफूलाई बदल्ने कोसिस नगरेको होइन, विविध कारणले त्यो सम्भव भएन। मैले गरेका प्रयास असफल हुँदा मैले नियमित रूपमा गरिरहेकै भूमिका सही हो कि जस्तो पनि लाग्यो, तर विस्तारै निर्माण शैलीमा आएको परिवर्तनका कारण मैले अभिनय गरेका फिल्महरू दर्शकका रोजाइमा कम पर्न थाले। फलतः मेरो उपस्थिति कम भयो,’ अभिनेता सिग्देलले भने।

उनलाई बदल्न वा नयाँ किसिमले प्रस्तुत गर्न निर्माताले पनि आँट गरेनन्। ‘गुड लुकिङ’ सँगै अभिनय गर्न सक्ने सिग्देल विस्तारै फिल्मबाट टाढिएको जस्तो भयो। तर, गत वर्ष प्रदर्शन भएको ‘पुजार सार्की’ पश्चात् उनको छवि फेरियो। ‘लभर ब्वाई’ का रूपमा परिचित सिग्देल अहिले अन्य पात्रमा पनि प्रस्तुत भइरहेका छन्।

‘मैले आफूलाई परिवर्तन गर्न नसकिरहेका बेला निर्देशक राउतले फरक पात्रका रूपमा दर्शकसामु ल्याउनुभयो। अहिले म पात्रमा रमाउन थालेको छु,’ उनले भने। सिग्देललाई मात्र नभई ‘प्रेम गीत’ चलचित्रमार्फत ‘प्रेम’ उपनामले समेत चिनिएका प्रदीप खड्कालाई समेत निर्देशक दिनेश राउतले ‘स्टारडम’ को छाया बाहिर ल्याएर अभिनय गराए। अर्थात् सुकिलामुकिला कपडा, आकर्षक शरीर र काल्पनिक दृश्यमा प्रस्तुत हुने अभिनेता खड्कालाई जुम्लाको ग्रामीण परिवारको युवकका रूपमा निर्देशक राउतले ‘प्रकाश’ मा प्रस्तुत गरे।

त्यसपछि सिग्देल र खड्कालाई निर्देशक राउतले ‘पुजार सार्की’ मा एकसाथ अभिनय गराए। ‘लभर ब्वाई’ को छवि बनाएका दुई अभिनेता ग्रामीण भेगका युवा झैँ देखिए। अन्य निर्देशकले कल्पना पनि नगरेको भूमिका सोच्नुको कारण सामीप्यता भएको निर्देशक राउतले बताउँछन्।

‘मैले उहाँहरु दुईलाई भेट्दा फिल्ममा गरिरहेको भूमिका र चेतनामा फरक पाएँ, किनकि उहाँहरू पनि आफूले गर्ने भूमिकामा मात्र सीमित हुने सोचमा हुनुहुन्थेन। मैले उहाँ दुईमा देखेको सोचले नै छवि बदल्ने भूमिका सुनाए। उहाँहरूले विश्वास गरेकै कारण चलचित्र सफल हुनाका साथै दर्शकले पनि रुचाउनुभयो,’ निर्देशक राउतले भने।

अभिनेतालाई एकै किसिमको भूमिकामा सीमित गर्न नहुने विचार उनको छ। सोही कारण आफ्ना प्रायः चलचित्रमा निर्देशक राउतले फरक भूमिकामार्फत नयाँ छवि निर्माण गर्छन्। ‘कलाकारलाई दर्शकले हेर्ने नजरिया कुनै न कुनै चलचित्रमार्फत नै निर्माण भएको हो, त्यसैले हामीले नयाँ प्रयोग गर्न डराउनु हुँदैन,’ उनी भन्छन्, ‘सधैं बजारमा चलेको ‘ट्रेन्ड’ लाई पछ्याउनु हुँदैन, हामीले नयाँ कुरा बजारलाई दिनुपर्छ।’

राउतले निर्देशन गरेको ‘महाभोज’ जेठ १५ देखि प्रदर्शनका लागि तयार छ। उक्त फिल्ममा सिग्देलसँगै दयाहाङ राई, खगेन्द्र लामिछाने, अञ्जना बराइली, पुस्कर गुरुङ, मलिका महतलगायतका कलाकारले अभिनय गरेका छन्। रासस