सडक सुधारका लागि नागढुङ्गा-नौबिसे खण्ड दिउँसो बन्द हुने, कुन-कुन छन् वैकल्पिक रुट?

काठमाडौं। त्रिभुवन राजपथअन्तर्गतको नागढुङ्गा-नौबिसे खण्ड आंशिकरूपमा बन्द हुने भएको छ। नागढुङ्गा-पिप्लामोड सडक सुधार गर्नका लागि आंशिकरूपमा बन्द गर्न लागिएको नागढुङ्गा मुग्लिन सडक योजना (पूर्वी खण्ड)ले जनाएको छ।

उक्त सडक आगामी शनिबारदेखि बिहीबारसम्म बिहान साढे १० बजेदेखि दिउँसो ३ बजेसम्म बन्द हुनेछ। सो अवधिमा सवारीसाधनहरू रोकेर निर्माण कार्य गरिने बताइएको छ।

सो समयमा काठमाडौंबाट नौबिसेतर्फ जाने सवारीसाधनहरू नागढुङ्गा चेकपोस्टमा र नौबिसेबाट काठमाडौंतर्फ जाने सवारीसाधनहरू खानीखोला बजारमा रोकिनेछन्। यद्यपि, दमकल, एम्बुलेन्स र सुरक्षा निकायका सवारीसाधन भने निर्वाध रुपमा संचालन हुनेछन्।

साना तथा मझौला सवारीसाधनहरूले वैकल्पिकरूपमा सीतापाईला-रामकोट-धार्के र सामाखुसी-टोखा-छहरे-त्रिशुली (विदुर)-गल्छी सडक प्रयोग गर्न सक्नेछन्।

रोकिएका सबै सवारीसाधनहरूलाई अपहान्ह ३ बजेपछि मात्र छोडिने बताइएको छ। सवारीसाधन रोक्दा र सवारी चलाउँदा कडाइका साथ आफ्नो लेन अनुशासन कायम राख्न तथा लामबद्ध भएको अवस्थामा जथाभावी ओभरटेक नगर्न योजनाले अनुरोध गरेको छ।