विद्युत प्राधिकरणले खुलायो पीपीए, ५४ वटा जलविद्युत आयोजनालाई ३० दिनको समयावधि

काठमाडौं। नेपाल विद्युत प्राधिकरणले ५ हजार मेगावाट विद्युतको खरिद/बिक्री सम्झौता(पीपीए) खुला गरेको छ।

प्राधिकरणको मंगलबार बसेको संचालक समिति बैठकले ४ हजार ९६५ मेगावाट का ५४ वटा जलविद्युत आयोजनाका लागि पीपीए खुला गर्ने निर्णय गरेको हो।

फागुन १२ गतेसम्म ग्रिड कनेक्सन एग्रिमेन्ट सम्पन्न भएका जलविद्युत आयोजनाको पीपीए गर्ने प्राधिकरणले जनाएको छ।

हितेन्द्रदेव शाक्यले प्राधिकरणमा कार्यकारी निर्देशकको पदबहाली गरेको दिन बसेको संचालक समिति बैठकले आयोजना ग्रिड कनेक्सन एग्रिमेन्ट भएको आयोजनाको पीपीए गर्ने निर्णय गरेको थियो।

पीपीएका लागि ३० दिनभित्र प्राधिकरणको विद्युत व्यापार विभागमा सम्पूर्ण कागजात र विवरण पेस गर्न भनिएको छ।

आयोजनाले निवेदन दिँदा कम्पनी दर्ताको प्रमाणपत्र, प्यान दर्ताको प्रमाणपत्र, कम्पनीको प्रबन्ध पत्र, कम्पनीको नियमावली, उद्योग दर्ताको प्रमाणपत्र, कर चुक्ताको प्रमाणपत्र, बहाल रहेको विद्युत सर्वेक्षणको अनुमतिपत्र, सेयर लागत विवरण, आयोजना निर्माणको तालिका, ग्रिड कनेक्सन एग्रिमेन्ट लगायत कागजात पेस गर्नु पर्नेछ।

५४ आयोजनामध्ये ३८ वटा नदी प्रवाह (पीओआर)मा आधारित छन् भने १६ आयोजना जलशाययुक्त हुन्।

प्राधिकरणका अनुसार नदी प्रवाहमा आधारित १ हजार ८५८ मेगावाट र अर्धजलाशययुक्त ३ हजार १०७ मेगावाट क्षमताका जलविद्युत आयोजनाको पीपीए गरिनेछ।

हाल प्राधिकरणले १० मेगावाटभन्दा साना आयोजनाको मात्र पीपीए गरिरहेको थियो।