इयूमा टिकटकलाई ५३ करोड युरो जरिवाना, युरोपेलीका व्यक्तिगत तथ्यांक दुरुपयोग आरोप

डब्लिन। युरोपेलीहरूको व्यक्तिगत तथ्यांक चिनियाँ अधिकारीहरूको पहुँचबाट बचाउने सुनिश्चतता गर्न असफल भएको आरोपमा टिकटकलाई शुक्रबार ईयूले ५३ करोड युरो ( करिब ६० करोड अमेरिकी डलर) को ठूलो जरिवानाको घोषणा गरेको छ।

अमेरिकाको समेत चासो बनेको टिकटकले ब्रसेल्सबाट जरिवानाको निर्णयविरुद्ध अपिल गर्ने योजना बताएको छ। उसले युरोपेली प्रयोगकर्ताको तथ्यांकका लागि चिनियाँ अधिकारीहरूबाट ‘कहिल्यै अनुरोध प्राप्त नभएको’ जनाएको छ।

आयरल्याण्डको तथ्यांक सुरक्षा अनुगमन संस्थाका अनुसार चीनको स्वामित्वमा रहेको विश्वप्रसिद्ध सामाजिक सञ्जाल टिकटकले अनुसन्धानका क्रममा चीनमा युरोपेली तथ्यांक ‘होस्ट’ गरेको स्वीकार गरेको थियो। टिकटकले डाटा ट्रान्सफरको वैधानिकताको बारेमा अनुसन्धान गरेपछि इयूले लगाएको यो दोस्रो ठूलो जरिवाना हो।

यसअघि सन् २०२३ मा आयरल्याण्डको तथ्यांक संरक्षण आयोगले टिकटकलाई ३४ करोड ५० लाख युरो जरिवाना गरेको थियो। टिकटक विशाल चिनियाँ प्रविधि कम्पनी बाइटडान्सको एक विभाग हो। टिकटकका साथै गुगल, मेटा र एक्स जस्ता अन्य सामाजिक सञ्जाल युरोपेली मुख्यालय आयरल्याण्डमा भएकोले आयरिस प्राधिकरण सामाजिक प्लेटफर्मको लागि युरोपमा प्रमुख नियामक हो।

डीपीसीका उपआयुक्त ग्राहम डोयलले भने, ‘टिकटकले युरोपेली प्रयोगकर्ताहरूको व्यक्तिगत तथ्यांक चीनमा कर्मचारीहरूको पहुँचबाट टाढा गरेका थिए र इयूले ग्यारेन्टी गरेको स्तरको सुरक्षा प्रदान गरिएको थियो भनी पुष्टि, सुनिश्चितता र प्रदर्शन गर्न असफल भएको छ।’

डोयलले विज्ञप्तिमा भनेका छन्, ‘टिकटकले चिनियाँ आतंकवाद विरोधी, जासूसीविरोधी र टिकटकले पहिचान गरेका अन्य कानुनअन्तर्गत युरोपेलीहरूको व्यक्तिगत तथ्यांकमा चिनियाँ अधिकारीहरूको सम्भावित पहुँचलाई सम्बोधन गरेको छैन।’

उक्त फैसलाको जवाफमा टिकटक युरोपकी क्रिस्टिन ग्राहनले भनिन्, ‘टिकटकले कहिल्यै पनि युरोपेली प्रयोगकर्ताको तथ्यांक चीनलाई उपलब्ध गराएको छैन। हामी यो निर्णयसँग असहमत छौं र अपिल गर्न चाहन्छौं।’ चीनले जासुसी वा प्रोपोगान्डाका लागि व्यक्तिगत तथ्यांक प्रयोग गर्न सक्ने डरले टिकटक वर्षौंदेखि पश्चिमा सरकारहरूको घेराबन्दीमा परेको छ। -एएफपी/रासस