सरकार र शिक्षक महासंघबीच सहमति : आन्दोलनका कार्यक्रम फिर्ता, असार १५ भित्र विधेयक

काठमाडौं। सरकार र आन्दोलनरत शिक्षक महासंघबीच सहमति भएको छ। सहमति अनुसार बिहीबारदेखि शिक्षकले सडक केन्द्रित सम्पूर्ण कार्यक्रम फिर्ता लिनेछन्। सरकारसँग भएको ९ बुँदे सहमति र विद्यालय शिक्षा विधेयक पारितका लागि संसदीय समिति र दलका पदाधिकारीले जनाएको प्रतिवद्धतापछि आन्दोलन रोकिएको हो।

विद्यालय शिक्षा विधेयक पारितलगायतका माग राखेर चैत २० गतेदेखि शिक्षक आन्दोलनमा थिए। एक महिनाको निरन्तर सडक प्रदर्शन अन्त्य गर्नेगरी सहमति भएको हो।

सरकार र संसदले गर्ने काममा प्रतिवद्धता भएको भन्दै महासंघले आन्दोलनका कार्यक्रम फिर्ता लिएको जनाएको छ।

असार १५ गतेभित्र विद्यालय शिक्षा विधेयक प्रतिनिधि सभाबाट पारित गर्ने प्रतिवद्धता शिक्षा समिति सभापति र सत्तापक्ष नेपाली कांग्रेस र नेकपा एमालेका संसदीय दलका प्रमुख सचेतकहरुले जनाएका छन्। यद्यपि माथिल्लो सदनबाट पारितको विषय भने सहमतिमा मौन छ।