सेयर बजार ९.९६ अंकले ओरालो लाग्दै २६८८.३२ विन्दुमा, कारोबार घटेर ८ अर्ब ३२ करोडको

काठमाडौं। सेयर बजारमा गिरावट आएको छ। मंगलबार नेप्से परिसूचक ९.९६ अंकले ओरालो लागेर २६८८.३२ विन्दुमा आएको छ। अघिल्लो दिनको भन्दा कारोबार रकम पनि घटेको छ।

होटल तथा पर्यटन, उत्पादन तथा प्रशोधन र अन्य बाहेकका उपसमूहका सूचक ओरालो लाग्दा बजार घटेको हो। लगानी १.८७ व्यापार १.६५ र विकास बैंक १.६१ प्रतिशतले घटेको छ।

१६० कम्पनीको सेयरमूल्य घट्दा तिनका लगानीकर्ताले गुमाएका छन्। कर्पोरेट डेभलपमेन्ट बैंकको सेयरमूल्य घटेर नेगेटिभ सर्किट लागेको छ।

८६ कम्पनीको सेयरमूल्य बढेको छ भने एउटा कम्पनीको सेयरमूल्य स्थिर रह्यो। दोस्रो बजार कारोबारमा आएको दिनदेखि नै लगातार सेयरमूल्य बढेका नेपाल माइक्रो इन्स्योरेन्स र क्रेस्ट माइक्रो लाइफ मंगलबार पनि अग्रणी रहे। दुवै कम्पनीको सेयर मूल्यमा पोजेटिभ सर्किट लागेको छ।

८ अर्ब ३२ करोड १२ लाख रुपैयाँको कारोबार हुँदा सर्वाधिक ङादी ग्रुप पावरको ४४ करोड ६० लाख रुपैयाँको सेयर कारोबार भएको छ। यस्तै, हिमालयन पावर पार्टनरको ४० करोड ९४ लाख र हिमालयन रि-इन्स्योरेन्सको ३६ करोड ४८ लाख रुपैयाँको सेयर किनबेच भएको छ।

यसअघि सोमबार नेप्से परिसूचक ७.७५ अंकले घटेर २६९८.२८ विन्दुमा रहँदा ८ अर्ब ७७ करोड ५७ लाख रुपैयाँको सेयर कारोबार भएको थियो।