स्वास्थ्य बीमा बोर्डको निर्णय : अनावश्यक परीक्षण रोक्न लगाउने, स्रोत बढाउन चिठ्ठा बेच्ने

काठमाडौं। स्वास्थ्य बीमा बोर्डले बीमामा बढ्दो दाबीले समस्या परेपछि अनावश्यक परीक्षण रोक्न सरकारको सहयोगमागेको छ।

बोर्डका अध्यक्ष चन्द्रबहादुर थापाको अध्यक्षतामा बसेको बैठकले अनावश्यक परीक्षण गरेर बीमामा अनावश्यक दाबी बढ्दा भुक्तानीमा समस्या देखिएको भन्दै अनावश्यक परीक्षण रोक्नका लागि स्वास्थ्य मन्त्रालयको सहयोग माग्ने निर्णय गरेको हो। बोर्डले प्रोटोकलअनुसार उपचारको व्यवस्था मिलाउन आग्रह गरेको छ।

बोर्डले आफ्नो स्रोत बढाउन नेपालमा औषधि बिक्री वितरण गर्ने सबै कम्पनीले खर्चको निश्चित प्रतिशत स्वास्थ्य बीमा कोषमा जम्मा गर्नुपर्ने प्रस्ताव अगाडि सारेको छ।

यसका लागि सहयोग गर्न स्वास्थ्य तथा जनसंख्या मन्त्रालयलाई पत्राचार गरेको बोर्डका कार्यकारी निर्देशक डा. रघुराज काफ्लेले जानकारी दिए।

बोर्डले आम्दानी बढाउने उपायस्वरुप स्वास्थ्य बीमा चिठ्ठा कार्यक्रम सञ्चालनका लागि सकारसँग अनुमति मागेको छ । विभिन्न देशमा समेत यस्तो अभ्यास रहेको भन्दै बोर्डले चिठ्ठाबाट स्रोत बढाउन सकिने बताएको छ।