वैदेशिक रोजगारीमा रहेका नेपालीलाई १० अर्बको नेपाल विकास कम्पनीमा लगानी गर्न आग्रह

काठमाडौं। नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानीको प्रशस्त सम्भावना भएको उल्लेख गर्दै वैदेशिक रोजगारीमा रहेका नेपालीलाई लगानीका लागि आह्वान गरेका छन्।

कतारको राजधानी दोहामा शुक्रबार साँझ बागलुङ सेवा समाज कतारको संरक्षकत्वमा बहुद्देश्यीय अक्षयकोष स्थापनाका लागि आयोजित प्रथम अधिवेशनलाई सम्बोधन गर्दै अध्यक्ष ढकालले आह्वान गरेका हुन्। नेपालमा केही पनि छैन, केही भएन भन्ने जस्ता बनाइएका गलत भाष्यलाई फेर्न जरुरी रहेको उनले बताएको महासंघले जनाएको छ।

‘नेपालमा सम्भावना नै छैन भन्ने गलत र नकारात्मक भाष्य बनाउन खोजिएको छ,’ उनले भने, ‘विदेशमा बसेर यहाँको विकास र प्रविधिसँग तुलना गर्दै नेपालको विरोध पनि गरिएको पाइन्छ, नेपालमा पनि विदेशमा जस्तै मेहनत गर्ने हो भने धेरै काम गर्न सकिन्छ।’

वैदेशिक रोजगारीमा रहेका नेपालीलाई लगानीको अवसर प्रदान गर्ने गरी १० अर्ब रुपैयाँ पुँजीको नेपाल डेभलपमेन्ट कम्पनी स्थापना गरिएको जानकारी गराउँदै ढकालले त्यस कम्पनीमार्फत लगानी गर्न वैदेशिक रोजगारीमा रहेका नेपालीलाई आग्रह गरे।

उक्त कम्पनीले मुलुकभित्र तथा बाहिर रहेका नेपालीहरुको छरिएर रहेको पुँजी संकलन गरी जलविद्युत्, पर्यटन, उद्योग तथा विभिन्न सम्भावना भएका क्षेत्रहरुमा लगानी गर्न गइरहेको उनले बताए।

उक्त कम्पनीमा सहभागी भइ लगानी गर्न उनले अनुरोध गरे। अध्यक्ष ढकालले बागलुङबाट कतारमा आएका बागलुङवासीले आफ्नो संस्थागत सामाजिक उत्तरदायित्वअन्तर्गत काम गर्न अक्षयकोष स्थापना गरेकोमा विशेष धन्यवाद दिँदै त्यस कोषमा १५ लाख रुपैयाँ सहयोग गर्ने घोषणा पनि गरेका थिए।

कार्यक्रममा बागलुङवासी पनि भएकाले अध्यक्ष ढकाललाई सम्मान प्रदान गरिएको थियो।