www.bizmandu.com
पर्यटनमन्त्री पाण्डेले क्यान विभाजन गर्ने विधेयक दुई महिनामा पनि संसद्मा पेस गर्न सकेनन्
काठमाडौं। पर्यटन तथा नागरिक उड्डयनमन्त्री बद्री पाण्डे नेपाल नागरिक उड्डयन प्राधिकरण (क्यान)लाई विभाजन गर्ने विधेयक संसद्मा पेस गर्न असफल भएका छन्।
संसद् सचिवालयमा ठिक दुई महिनाअघि दर्ता भएका नेपाल हवाई सेवा प्राधिकरण र नेपाल नागरिक उड्डयन प्राधिकरण विधेयक पेस गर्न पाण्डे असफल भएका हुन्।
यो अवधिमा पाँच वटा अध्यादेशलाई प्रतिस्थापन गर्ने विधेयक प्रतिनिधि सभा र राष्ट्रिय सभाबाट पारित भइ राष्ट्रपतिबाट प्रमाणीकरण हुँदा पाण्डेले भने दुई महिनाअघि दर्ता भएको विधेयक पेस गर्नै नसकेका हुन्।
नेपाल हवाई सेवा प्राधिकरण र नेपाल नागरिक उड्डयन प्राधिकरण विधेयक दर्ता हुँदा अध्यादेश प्रतिस्थापन गर्ने विधेयक तयार भएकै थिएनन्।
मन्त्री पाण्डेले नेपाल हवाई सेवा प्राधिकरण र नेपाल नागरिक उड्डयन प्राधिकरण विधेयकमाथि विचार गरियोस् भन्ने प्रस्ताव मंगलबारको बैठकमा पेस गर्ने कार्यसूची थियो। तर, राप्रपाका सांसद दीपक बोहराको निधनका कारण सभामुख देवराज घिमिरेले त्यसलाई कार्यसूचीबाट हटाए।
यी दुई विधेयक संसद्मा पेस गर्न अब बजेट अधिवेशन पर्खनुपर्ने भएको छ। बोहराको निधनमा शोक प्रस्ताव पारित गर्दै हिउँदे अधिवेशनको अन्तिम बैठक अन्त्य गरिएको छ।
बोहराको निधनका कारण जलस्रोत र शहीद दशरथ चन्द स्वास्थ्य विज्ञान विश्वविद्यालय विधेयक पारित गर्ने कार्यसूची पनि प्रभावित भएको छ।
यस्तै, बैंकिङ कसूर तथा सजाय (दोस्रो संशोधन) विधेयक पनि अड्किएको छ। मंगलबारको बैठकबाट बैंकिङ कसूर तथा सजाय (दोस्रो संशोधन) विधेयकमाथि राष्ट्रिय सभाले गरेको संशोधन निर्णयार्थ पेस गर्ने कार्यसूची थियो।
यस्तै, अर्थ समितिका सभापति सन्तोष चालिसेले भन्सार विधेयकमाथि दफाबार छलफल गरेर तयार पारिएको प्रतिवेदन प्रस्तुत गर्न पाएनन्।