सगरमाथामा थुप्रिएको फोहोर संकलन गर्न नेपाल लाइफ र राउन्ड टेबल नेपालबीच समझदारी

काठमाडौं। नेपाल लाइफ इन्स्योरेन्सले सगरमाथामा हुने फोहोर व्यवस्थापनका लागि लगानी गर्ने भएको छ।

बिहीबार इन्स्योरेन्स र राउन्ड टेबल नेपालबीच सगरमाथामा थुप्रिएको फोहोर व्यवस्थापन गर्ने सम्बन्धी समझदारी भएको हो।

इन्स्योरेन्सका प्रमुख कार्यकारी अधिकृत प्रवीणरमण पराजुली र राउन्ड टेबल नेपालका अध्यक्ष प्रवेश अग्रवालले समझदारी पत्रमा हस्ताक्षर गरेका हुन्।

पराजुलीले सगरमाथा नेपालको मात्रै नभएर अन्तर्राष्ट्रिय सम्पत्ति भएकाले चुनौतीपूर्ण बन्दै गएको फोहोर व्यवस्थापनका लागि नेपाल लाइफले राउन्ड टेबल नेपालसँग सहकार्य गरेको बताए।

‘नेपालको पहिचानको रूपमा रहेको सम्पदामा आरोहणका क्रममा थुप्रिने फोहोरलाई काठमाडौंमै ल्याएरै रिसाइकल गर्ने योजना छ’, उनले भने, ‘जलवायु परिवर्तनको बढ्दो चुनौतीलाई हेर हिमाली क्षेत्रमा मानवीय कारण थुप्रिरहेको फोहोर सफा गर्न नेपाल लाइफले यो इनिसियसन लिएको हो।’

पराजुलीले नेपाल लाइफले वैकल्पिक लगानी र लगानी विविधीकरणका लागि विभिन्न क्षेत्रमा लगानी गरिरहेको बताए।

राउन्ड टेबल नेपालका अध्यक्ष अग्रवालले फोहोर व्यवस्थापनका क्षेत्रमा संस्थाले काम गर्दै आएको बताए।

‘राउन्डटेबल नेपालले २५ वर्षदेखि वातावरण, स्वास्थ्य र शिक्षाका क्षेत्रमा काम गर्दै आएको गैरसरकारी संस्था हो। हामीले अब प्रोजेक्ट केयरको माध्यमबाट विश्व सम्पदाको रूपमा रहेको सगरमाथामा हुने प्रदूषण नियन्त्रणका लागि नेपाल लाइफसँगको पार्टनरमा सफलता हासिल गर्नेछौँ। यसले नेपाल विश्वमा स्वस्थ वातावरणको रूपमा रहेको पहिचान गर्नेछ,’ उनले भने।

फोहोर व्यवस्थापनका लागि प्राविधिक पार्टनर सगरमाथा प्रदूषण नियन्त्रण कमिटी (एसपीसी) रहेको छ। एसपीसीले सोलुखुम्बुको खुम्बु क्षेत्रमा हुने प्रदूषण व्यवस्थापनका लागि तीन दशकदेखि काम गर्दै आएको छ।