कुखुरापालक कम्पनी दाउन्ने एग्रो फार्मले १० करोड बराबरको आइपीओ जारी गर्दै

चितवन। दाउन्ने एग्रो फार्म लिमिटेडले १० करोड रुपैयाँ बराबरको सर्वसाधारणका लागि सेयर (आइपीओ) जारी गर्ने भएको छ। फार्म स्थापनापछिको सातौँ र पब्लिक कम्पनीमा प्रवेशपछिको प्रथम वार्षिक साधारणसभाले आइपीओ जारी गर्ने निर्णय गरेको हो।

नवलपरासी (सुस्ता-त्रिवेणी पूर्व) विनयीत्रिवेणी गाउँपालिका-३ को सर्दीमा करिब ११ बिघा जग्गामा फैलिएको ‘एग्रो फार्म’मा सो कम्पनीको अहिले ४ लाख कुखुरा रहेका छन्। कम्पनीले निकट भविष्यमै ६ लाख कुखुरा पुर्‍याउने लक्ष्य लिएको अध्यक्ष रघुनाथ भट्टले जानकारी दिए।

कुखुरापालन क्षेत्रमा आइपीओ जारी गर्ने ‘एग्रो फार्म’ पहिलो हुने कम्पनीले दाबी गरेको छ।

कम्पनीको साधारणसभाले रघुनाथ भट्टको अध्यक्षतामा संचालक समिति सर्वसम्मत चयन गरेको छ। समितिका संचालक सदस्यहरूमा विनोद पोखरेल, विपिन पोखरेल, हेमराज बडाल र हिमालय पौडेल रहने प्रबन्ध संचालक विनोद पोखरेलले जानकारी दिए।

विसं २०७४ मा स्थापना भएको यस कम्पनीमा सुरुआतमा १ लाख कुखुरापालन गरिएको थियो। कम्पनीका प्रबन्ध संचालक पोखरेलका अनुसार फार्ममा हाल दैनिक ३ लाख ५० हजारभन्दा बढी अण्डा उत्पादन हुने गरेको छ।

उत्पादित अण्डामध्ये केहीलाई ‘दाउन्ने ह्याप्पी एग’को ब्रान्डमा ब्रान्डिङ गरी १५ वटा र ३० वटाका दरले क्रेट बनाएर बजारमा पठाउने गरिएको प्रबन्ध संचालक पोखरेलले जानकारी दिए। यहाँ उत्पादित अण्डा देशका प्रमुख सहरहरूसँगै ग्रामीण क्षेत्रमा समेत पठाइने गरिएको छ।

प्रबन्ध संचालक पोखरेलका अनुसार दाउन्नेको फार्ममा जर्मनी र मलेसियाबाट आयात गरिएका स्वचालित एवं अत्याधुनिक उपकरण जडान गरिएका छन्।

उनले भने, ‘अत्याधुनिक तवरबाट कुखुरापालन गरिएकाले अण्डा तथा मासुको उत्पादन राम्रो छ, अहिलेलाई बजारको समस्या छैन, यसलाई अझ विस्तार गरी देशकै उत्कृष्ट एवं व्यावसायिक एग्रो फार्मका रुपमा स्थापित गर्ने लक्ष्य लिएका छौँ, ७ वर्षको हाम्रो अनुभव र परिणामबाट सफल हुने विश्वास लिएका छौँ।’

नेपालमा लामो समयसम्म कुखुरापालन क्षेत्रमा अनुभव सँगालेका कृषक तथा व्यवसायीहरूको लगानीमा यो कम्पनी स्थापना भएको अध्यक्ष भट्टले जानकारी दिए। यहाँका लगानीकर्ताहरूको पोल्ट्रीसँग सम्बन्धित विभिन्न उद्योगहरूमा समेत लगानी छ। जसका कारण लागत मूल्य घटाउन र गुणस्तरीय अण्डा उत्पादन गर्न सफल भएको अध्यक्ष भट्ट बताउँछन्।

नेपालमा तुलनात्मक रुपमा ठूलो सङ्ख्यामा कुखुरापालन गर्ने ‘एग्रो फार्म’ पहिलो कम्पनी भएको र सेयर निष्कासनका लागि सिटिजन्स क्यापिटलसँग कम्पनीले सम्झौता गरिसकेको प्रबन्ध संचालक पोखरेलले बताए। रासस