बाढीपहिरोको क्षतिमा १२.३६ अर्बको बीमा दाबी, इन्स्योरेन्सले भुक्तानी दिए ९.६७ प्रतिशत मात्रै

काठमाडौं। असोज दोस्रो साता बाढीपहिरोले पुगेको क्षतिका कारण १२ अर्ब ३६ करोड ६५ लाख रुपैयाँको दाबी परेकामा इन्स्योरेन्स कम्पनीले मंसिर २६ गतेसम्म १ अर्ब १९ करोड ६४ लाख रुपैयाँ मात्र भुक्तानी गरेका छन्।

कम्पनीहरुले भुक्तानी गरेको रकम दाबीको ९.६७ प्रतिशत मात्रै हो। नेपाल बीमा प्राधिकरणका अनुसार डेढ दर्जन निर्जीवन बीमा कम्पनीले १ हजार ५१४ दाबी भुक्तानी गरेका हुन्।

बाढीपहिरोका कारण बीमा कम्पनीमा ३ हजार ५४९ दाबी परेको थियो। शिखर इन्स्योरेन्सले सबैभन्दा धेरै ३० करोड ३८ लाख रुपैयाँ दाबी भुक्तानी गरेको छ। यस कम्पनीमा १ अर्ब १५ करोड ९५ लाख रुपैयाँको दाबी परेको थियो।

सिद्धार्थ प्रिमियर इन्स्योरेन्समा सर्वाधिक २ अर्ब ६२ करोड रुपैयाँको दाबी परेकामा उसले २५ करोड ५२ लाख रुपैयाँ भुक्तानी गरेको छ।

प्राधिकरणका अनुसार बाढीपहिरोले सम्पत्ति बीमाको सर्वाधिक ९ अर्ब रुपैयाँको दाबी आएकामा ८७ करोड ४९ लाख रुपैयाँ मात्रै भुक्तानी गरिएको छ।

इन्जिनियरिङ तथा ठेकेदार जोखिम बीमामा २ अर्ब ६० करोड रुपैयाँ दाबी परेकामा ४ करोड ४३ लाख रुपैयाँ भुक्तानी भएको छ।