कीर्तिपुर नगरपालिकाको मेयर पदमा २० जनाको उम्मेदवारी, दलका ९ जना, बाँकी स्वतन्त्र

काठमाडौं। कीर्तिपुर नगरपालिकाको मेयर पदका लागि २० जनाको उम्मेदवारी परेको छ।

मंसिर १६ गते हुने उपनिर्वाचन अन्तर्गत आइतबार उम्मेदवारी दर्ताको मिति तोकिएकामा राजनीतिक दलका तर्फबाट ९ जना र स्वतन्त्र ११ जनाले मनोनयन दर्ता गराएका हुन्।

निर्वाचन अधिकृतको कार्यालयका अनुसार नेपाली कांग्रेसले कृष्णमान डंगोल, नेकपा एमालेले डा. सुरेन्द्र मानन्धर, माओवादी केन्द्रले प्रा डा शिवशरण महर्जन र राप्रपाले ध्रुव महर्जनलाई उम्मेदवार बनाएका छन्।

नेकपा एकीकृत समाजवादीले माओवादी केन्द्रका उम्मेदवारलाई समर्थन गर्ने सहमति भएको भनिएपनि उक्त पार्टीका तर्फबाट भानु रिजाल मैदानमा होमिएका छन्।