अस्ताउँदो सूर्यलाई अर्घ्य दिँदै भक्तपुरको कमल पोखरीमा भव्य रुपमा मनाइयो छठ पर्व

भक्तपुर। भक्तपुरको कमल पोखरीमा आज छठ पर्व भव्य रुपमा मनाइएको छ। छठ पर्वका लागि यो पोखरी झकिझकाउ बनाइएको छ।

तराई/मधेशबाट आएर भक्तपुरमा विभिन्न पेसा, व्यवसाय गर्ने स्थायी तथा अस्थायी रूपमा बसोबास गरेकाले कमल पोखरीमा छठ मनाएका छन्। सिङ्गारिएको पोखरीमा मूर्ति राखेर पूजा गरिएको छ।

छठपर्वको अवसरमा बिहीबार साँझ अस्ताउँदो सूर्यलाई अर्घ्य दिइएको छ। शुक्रबार सप्तमीका दिन उदाउँदो सूर्यलाई अर्घ्य दिएपछि विधिवत् रूपमा छठ समापन हुन्छ।

कार्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजा गरिने यो पर्व मंगलबारदेखि सुरु भएको हो। ऐतिहासिक पौराणिक ग्रन्थ महाभारतमा उल्लेख भएअनुसार द्रोपदीसहित पाँच पाण्डव अज्ञातवासमा रहँदा उक्त गुप्तवास सफल होस् भनी सूर्यदेवलाई आराधना गरिएको थियो।