वसन्तपुरमा ‘हाथु हायेकेगु’ : श्वेत भैरवको मुखबाट महिलाहरुलाई बाँडियो प्रसाद

काठमाडौं अहिले यँया: (इन्द्रजात्रा) पर्वमा रमिरहेको छ। वसन्तपुर दरबार क्षेत्रबाट गत आइतबारदेखि थप गुलजार बनिरहेको छ।

यसबीच हरेक हनुमानढोकामा रहेको हाथुद्यः (श्वेत भैरव) को मुखबाट प्रसाद (जाँड) र समयबजी वितरण गरिँदैछ। यसलाई नेपालभाषामा ‘हाथु हायेकेगु’ भनिन्छ।

बिहीबार राति पनि प्रसादका लागि ठूलो संख्यामा मानिसहरु हनुमानढोकामा उपस्थित थिए। इन्द्रजात्राका आठै दिन देवताको मूर्तिको मुखबाट निकालिएको पाइपबाट जाँडको प्रसाद बगाएर बाँडिन्छ।

बिहीबार भने महिलाहरुका लागि मात्रै हाथु हायेकेगु गरिएको थियो। वसन्तपुरमा प्रसाद खाने र प्रसाद खाएको हेर्नेको घुइँचो थियो।

झन्डै १५ फिट अग्लो अनुहारमात्रैभएको हाथुद्यःलाई नेपालकै सबैभन्दा ठूलो अनुहार भएको देउताको मूर्तिका रुपमा पनि लिइन्छ। खासमा यो सेतो पत्थरले बनेको मूर्ति हो। अहिले भने यसलाई सुनले मोडिएको छ। राजा रणबहादुर शाहले यो मूर्तिमा सुनले मोड्‌न लगाएको बताइन्छ।