एक वर्षमा १८ लाख ३९ हजार थान स्मार्टफोन आयात, मूल्य २८ अर्ब ६६ करोड

काठमाडौं। गत आर्थिक वर्ष २०८०/८१ मा आर्थिक वर्ष २०७९/८० को तुलनामा ४ अर्ब २६ करोड रुपैयाँ बढीको स्मार्टफोन आयात भएको छ।

भन्सार विभागको तथ्यांक अनुसार गत वर्ष २८ अर्ब ६६ करोड रुपैयाँको स्मार्टफोन आयात भएको छ। आव २०७९/८० मा २४ अर्ब ३९ करोड रुपैयाँको फोन आयात भएको थियो।

२०७९/८० मा १५ लाख ६९ हजार थान स्मार्टफोन भित्रिएकामा गत वर्ष १८ लाख ३९ हजार थान आयात भएको विभागले जनाएको छ।

विभागका अनुसार असारमा २ अर्ब ३३ करोड रुपैयाँ बराबरको १ लाख २८ हजार ९०० थान स्मार्टफोन आयात भएको छ।

स्मार्टफोन आयातबाट सरकारले उठाउने राजस्व पनि वृद्धि भएको छ। २०७९/८० मा ४ अर्ब ५५ करोड रुपैयाँ भन्सार संकलन गरेको सरकारले गत वर्ष ५ अर्ब ३३ करोड रुपैयाँ उठाएको छ।

आर्थिक वर्ष २०७८/७९ मा करिब ४१ अर्ब रुपैयाँ बराबरको ५७ लाख ६३ हजार थान स्मार्टफोन आयात भएको थियो। जसबाट सरकारले ६ अर्ब ५४ करोड रुपैयाँ राजस्व उठाएको थियो।