साउदी अरबले नेपाललाई दियो ७४ रनको लक्ष्य

काठमाडौ । नेपाली क्रिकेट टोलीले साउदी अरबबाट ७४ रनको लक्ष्य पाएको छ। एसियाली क्रिकेट परिषद (एसीसी) प्रिमियर कपमा वर्षाका कारण ८ ओभरमा छोट्याइएको खेलमा साउदीले निर्धारित ओभरमा ७ विकेट गुमाउँदै ७३ रन बनाएको हो।

नेपाली टोलीका कप्तान रोहितकुमार पौडेलले टस जितेर साउदीलाई ब्याटिङको निम्ता दिएका थिए।

सुरुवाती ब्याटिङमा उत्रिएको साउदीका लागि अब्दुल वाहीदले बिस्फोटक ब्याटिङ गर्दै १६ बलमा ३७ रन बनाए। त्यसबाहेकका अन्य ब्याटरले दोहोरो अंकको रन जोड्न सकेनन्।

बलिङतर्फ नेपालका करण करण केसी र अभिनास बोहराले समान २ विकेट लिँदा ललितनारायण राजवंशी र प्रतिस जिसीले समान १ विकेट लिए।

समूह ‘ए’ मा अपराजित रहेको नेपालले तीन खेलबाट ६ अंक जोड्दै समूह विजेता बन्ने पक्का गरिसकेको छ। समूह चरणका शीर्ष दुई टोली सेमिफाइनलमा पुग्नेछन्। टी-२० वरीयतामा नेपाल १७ औँ स्थानको टोली हो भने साउदी ३१ औँ स्थानको टोली हो।