सेल्सबेरी डिपार्टमेन्ट स्टोरको माउ सेलवेजको व्यापार ५७ करोडले बढेर २.८१ अर्ब नाघ्यो

काठमाडौं। सेल्सबेरी डिपार्टमेन्ट स्टोरको माउ संस्था सेलवेज क्यास र क्यारी कम्पनीले २०२२/२३ मा २ अर्ब ८१ करोड ९० लाख रुपैयाँको कारोबार गरेको छ। अघिल्लो वर्ष २०२१/२२ को तुलनामा यो ५७ करोड १० लाख रुपैयाँ बढी हो।

२०२१/२२ मा कम्पनीले २ अर्ब २४ करोड ८० लाख रुपैयाँको व्यापार कम्पनीले गरेको थियो। २०२०/२१ मा २ अर्ब, २०१९/२० मा १ अर्ब ७३ करोड र २०१८/१९ मा १ अर्ब ४८ करोड रुपैयाँको व्यापार गरेको थियो।

सेल्सबेरी र सेल्सबेरी एक्सप्रेसको ब्राण्डमा कम्पनीले काठमाडौं, ललितपुर र पोखरामा ३१ वटा स्टोर संचालनमा छ।

पछिल्लो समय नेपाली उपभोक्ताहरुको रोजाइ ठूला सुपरमार्केट/स्टोर भएसँगै फास्ट मुभिङ कन्जुमर गुड्स (एफएमसीजी) मो माग बढ्दै गएको छ। मागलाई पूर्ति गर्नैका लागि कम्पनीले केही वर्षयता आक्रामक रूपमा आउटलेट विस्तार गर्दै लगेको छ। आउटलेट विस्तारमा लागेपछि कम्पनीले दीर्घकालीन कर्जा (लङ टर्म लोन) र वर्किङ क्यापिटल लोन अधिक प्रयोग गर्दै आएको छ।

कम्पनीको प्रमुख आम्दानीको स्रोत एफएमसीजी छ। कम्पनीले सन् १९९२ पहिलो डिपार्टमेन्ट स्टोर पोखरामा खोलेको थियो। जसलाई कम्पनीले सेल्वेज डिपार्टमेन्टल स्टोर नामकरण गरिएको थियो। सेल्सबेरी एक्सप्रेस भने सानो डिपार्टमेन्ट स्टोर भएको कम्पनीले जनाएको छ।

सेलवेज क्यास र क्यारी कम्पनीले इक्रा नेपालबाट २ अर्ब ४५ करोड रुपैयाँ कर्जाका लागि रेटिङ गराएको छ। १ अर्ब ४४ करोड रुपैयाँको दीर्घकालीन कर्जाका लागि कम्पनीले एनपी एल बी प्लस र १ अर्ब रुपैयाँभन्दा बढी अल्पकालीन कर्जाका लागि कम्पनीले एनपी ए फोर रेटिङ पुन:पुष्टि गराएको छ।

कम्पनीमा सुशीलमान प्रधानांग (५१%) र सृजना श्रेष्ठ (४९%) को सेयर स्वामित्व छ। प्रधानांग कम्पनीका प्रमुख कार्यकारी अधिकृत हुन्।