नवलपरासीको एक रेष्टुरेन्टमा प्रहरीको छापा, नक्कली नोटसहित पक्राउ परे दुई युवक

काठमाडौं। नवलपरासीबाट प्रहरीले नक्कली नोट र नोट बनाउन प्रयोग हुने सामानसहित २ जनालाई पक्राउ गरेको छ।

पक्राउ पर्नेहरूमा नवलपरासी पूर्वको बुलिङटार गाउँपालिका-६ ठिमुरे बस्‍ने ३० वर्षीय कृष्णबहादुर बिक र तनहुँको ऋषिङ गाउँपालिका-३ दानश्री बस्‍ने २५ वर्षीय सुरज बिक रहेको प्रहरीले जानकारी दिएको छ। बर्दघाट नगरपालिका-४ फलफुल चोकस्थित विनय रेष्टुरेन्टबाट नेपाली १ हजार दरको १ सय ३९ थान नक्कली नोट, नक्कली नोट बनाउन प्रयोग हुने सामानहरुसहित उनीहरु पक्राउ परेका हुन्।

विशेष सूचनाको आधारमा जिल्ला प्रहरी कार्यालय र इलाका प्रहरी कार्यालय बर्दघाटबाट खटिएको प्रहरीले उनीहरू बसेको रेष्टुरेन्टको कोठामा तलासी गर्दा नक्कली नोट र नक्कली नोट बनाउन प्रयोग हुने स्ट्याम्प प्याड ३ थान, चम्किलो स्टिकर टेप ६ थान, ग्लु १० थान, मसी, ब्रस, फलामे स्केल, कैची लगायतका विभिन्‍न सामानसहित पक्राउ गरेको हो।

घटनाको थप अनुसन्धान भइरहेको प्रहरीले जानकारी दिएको छ।