थिङगरको बाँझो जमिनमा कृषकको खनजोत, गाउँपालिकाको सहयोगमा सामुहिक आलुखेती

काठमाडौं । मुस्ताङको लोमान्थाङ गाउँपालिका-३ थिङगरका कृषकले बाँझो जमिनमा सामूहिकरूपमा व्यावसायिक आलुखेती गरेका छन्। लोमान्थाङ गाउँपालिकाको आर्थिक सहयोगमा ठेकार कृषक समूहले १३० रोपनी जग्गामा सामूहिक आलुखेती गरेका हुन्।

समूहका अध्यक्ष कर्म साम्टुक गुरुङले धेरै वर्षअघिदेखि बाँझो रहेको जमिनमा खनजोत गरेर सामूहिकरूपमा व्यावसायिक आलुखेती गरेको जानकारी दिए।

‘१३ जनाको समूहमा बाँझो जग्गा खनजोत गरेर स्थानीय जातको आलुखेती गरेका छौं’, उनले भने, ‘कामको खोजीमा विदेश नगई यही आलुखेतीलाई निरन्तरता दिने योजनामा छौं।’

अहिले गत जेठको पहिलो हप्ता लगाएको आलु खनेर भित्र्याउने चटारो मा उनीहरु छन्। २० रोपनी जमिनबाट पाँच लाख ६२ हजार ५०० मूल्य बराबरको ११ हजार २५० किलोग्राम आलु निकालिसकेको समूहले जनाएको छ।

लोमान्थाङ, जोमसोम, कागबेनी, मुक्तिनाथ, बेनी, बागलुङ, पोखरा र काठमाडौंको बजारमा यहाँको आलु खपत हुने गरेको छ। प्रतिकिलो ५० रुपैयाँका दरले बारीबाटै आलु बिक्री भएको छ।

चिसो हावापानीमा रासायनिक मल र विषादीको प्रयोगबिना उत्पादन भएको आलुले राम्रो बजार पाएकाले आगामी वर्ष खेती विस्तार गर्ने योजना रहेको समूहका सदस्य राजु गुरुङले बताए।

‘रासायनिक मल र विषादीको प्रयोगबिना चिसो हावापानीमा प्राङ्गारिक प्रविधिबाट आलुखेती गरेका छौं’, उनले भने, ‘स्वादिष्ट, स्वस्थ र गुणस्तरीय भएकाले आलुले राम्रो बजार पाएको छ।’

थिङगरमा आलुखेतीका लागि लोमान्थाङ गाउँपालिकाले गत आर्थिक वर्ष २०७९-८० मा २० लाख रुपैयाँ अनुदान उपलब्ध गराएको थियो। समूहले थप २० लाख रुपैयाँ लगानी गरेको छ।

अध्यक्ष गुरुङले गाउँपालिकाको अनुदानमा बीउ, मल खरिद र खनजोत गरिएको बताए। कृषि ज्ञान केन्द्रले सिँचाइका लागि नहर बनाउन गत आर्थिक वर्षमा दुई लाख रुपैयाँ सहयोग गरेको थियो।

बाँझो जमिनको सदुपयोग, आयात घटाएर आलुमा आत्मनिर्भर बनाउने, रोजगारी सिर्जना र कृषकको आयआर्जन वृद्धिका लागि सामूहिक आलुखेतीसम्बन्धी कार्यक्रम संचालन गरेको लोमान्थाङ गाउँपालिकाका अध्यक्ष टसी नर्बु गुरुङले जानकारी दिए।