मनकामना इन्जिनियरिङ हाइड्रोले आइपीओ बिक्री गर्दै, प्रति मेगावाट लागत नै २८ करोड

काठमाडौं। मनकामना इन्जिनियरिङ हाइड्रोपावरले असार १९ गतेबाट आयोजना प्रभावित र वैदेशिक रोजगारीमा गएकाहरुलाई आइपीओ बिक्री गर्ने भएको छ। 

कम्पनीले दोलखाका स्थानीयलाई ८ लाख कित्ता सेयर छुट्याएको छ। गौरीशंकर गाउँपालिका वडा नं ५, ६, ७, ८ र बिगु गाउँपालिका वडा नं ४ र कालिन्चोक गाउँपालिका वडा नं ३ का बासिन्दाले आवेदन दिन पाउँछन्।

त्यसैगरी २ लाख कित्तामा वैदेशिक रोजगारमा गएकाहरुले आवेदन दिन मिल्छ। दुवैले आवेदन दिने अन्तिम दिन साउन २ गते हो। म्यादसम्म पर्याप्त आवेदन नआए स्थानीयका लागि साउन १७ गतेसम्म लम्बिनेछ। वैदेशिक रोजगारले भने साउन २ गतेसम्म दिइसक्नुपर्नेछ।

न्यूनतम १० कित्ताका लागि आवेदन दिन मिल्छ। धेरैमा आयोजना प्रभावितहरुले १ लाख कित्ता र श्रमिकहरुले ५० हजार कित्ता आवेदन पेस गर्न मिल्छ।

कम्पनीले ५ मेवाको घट्टेखोला जलविद्युत आयोजना निर्माण गर्दैछ। जसको कुल लागत १ अर्ब ३९ करोड अनुमान गरेको छ। प्रति मेगावाट अनुमानित लागत २७ करोड ८७ लाख रुपैयाँ छ। यो नदी प्रवाहमा आधारित आयोजना हो।