टेकुको शुक्रराज ट्रपिकल अस्पताल अत्याधुनिक बन्दै, साढे २ अर्बमा यस्तो बन्नेछ अस्पताल

काठमाडौं। टेकुको शुक्रराज ट्रपिकल तथा सरुवा रोग अस्पताल ३०० बेडमा विस्तार गरिने भएको छ। यसका लागि सघन सहरी तथा भवन निर्माण आयोजनाले बिहीबार २ अर्ब ४४ करोड ८४ लाख ५९ हजार रुपैयाँमा ठेक्का टुंगो गरेको छ।

यसको ठेक्का कोनटेक-गौरी पार्वती जेभीले पाएको छ। भवन निर्माण, फर्निचर, अक्सिजन पाइनलाइन, अप्रेसन थिएटर, बेड लगायतका कामका लागि ३ अर्ब ८६ लाख रुपैयाँ लागत अनुमान गरिएको थियो। तर, यो कम्पनीले सबैभन्दा कम कबोल गरेको कारण ठेक्का पाएको हो।

सरकारले आर्थिक वर्ष २०७७/७८ मा ल्याएको बजेट कार्यक्रममा चालु वर्षमा काठमाडौंमा ३०० बेडको सुविधासम्पन्न सरुवा रोग अस्पताल निर्माण गर्ने भनिएको थियो। त्यही योजनाअनुसार अहिले निर्माणको ठेक्का लागेको हो।

यो अस्पताल निर्माणका लागि गुरुयोजना बनाइएको छ। शुक्रराज अस्पतालका नाममा ७० रोपनी १ आना जग्गा छ। अस्पताल हाल १६ रोपनीमा सञ्चालित छ।

स्वास्थ्य संस्था स्थापना सञ्चालन तथा स्तरोन्नति मापदण्डसम्बन्धी निर्देशिका, २०७० अनुसार ३ सय शय्याको अस्पताल सञ्चालन गर्न ३२.४८ रोपनी आवश्यक पर्छ। अन्य क्षेत्रमा यसलाई पुग्ने जग्गा नपाएपछि हालकै टेकु अस्पताललाई स्तरोन्नति गर्न लागिएको हो।

नयाँ भवन निर्माणअघि हालका केही भवन भत्काउनुपर्ने छ। करिब १७ रोपनी जग्गामा ६ तले भवन निर्माण गरिने अस्पतालले जनाएको छ। आयोजनाका अनुसार निर्माण सुरु भएको साढे तीन वर्षमा अस्पतालका सबै संरचना तयार हुने लक्ष्य छ।

केही समयावधिमा निर्माण व्यवसायी र आयोजनाबीच सम्झौता हुने र निर्माणको कामले तीब्रता पाउने आयोजनाले जनाएको छ।

भवनमा के के रहन्छ ?

डिजाइन अनुसार ३०० बेडको सो नयाँ भवन ६ तलाको हुनेछ। सबैभन्दा तलको बेसमेन्टमा ५० वटा चारपांग्रे र २ सयभन्दा बढी मोटरसाइकल अट्ने पार्किङ हुनेछ। भुइँतलामा आकस्मिक, बहिरंग कक्ष र रेडियोलोजी विभाग रहनेछन्। पहिलो तलामा प्रयोगशाला, बहिरंग कक्ष, फिभर वार्ड रहनेछ।

दोस्रो तलामा अनुसन्धानमूलक विशेष प्रयोगशाला, जनरल वार्ड, इमर्जिङ आइसोलेसन वार्ड हुनेछन् भने तेस्रो तलामा पोषण, प्रत्यारोपण, हेमाटोलोजी, मेलिगेन्सी वार्ड, नवजीवन वार्ड रहनेछन्। चौथोमा रेबिज-टिटानस, छालारोग विभाग र टीबी वार्ड रहेनछन्।

त्यसैगरी पाँचौ तलामा ३० बेडको आईसीयु बेड, शल्यक्रिया, भीभीआईपी क्याबिन र सेमिनार हल रहनेछ। छैटौं तलामा लन्ड्री तथा क्यान्टिन रहने अस्पतालले जनाएको छ। यसैगरी, बिरामी र कर्मचारीका लागि छुट्टाछुट्टै लिफ्ट रहनेछ।