BIZMANDU
www.bizmandu.com

५० करोड रुपैयाँ लागतमा युनाइटेडको लुब्रिकेन्ट्स तयार, वैशाखदेखि बजारमा उत्पादन

२०७९ चैत्र ६

५० करोड रुपैयाँ लागतमा युनाइटेडको लुब्रिकेन्ट्स तयार, वैशाखदेखि बजारमा उत्पादन
५० करोड रुपैयाँ लागतमा युनाइटेडको लुब्रिकेन्ट्स तयार, वैशाखदेखि बजारमा उत्पादन


काठमाडौं। युनाइटेड लुब्रिकेन्ट्स इन्डष्ट्रिजले ५० करोडको लगानीमा नेपालमै लुब्रिकेन्ट्स उत्पादन गर्ने भएका छन्।

Tata
GBIME
Nepal Life

अटोमोबाइल पार्ट्स र अन्य व्यवसायको क्षेत्रमा प्रतिष्ठित सत्यदीप ग्रुपले खाद्य उद्योग तथा अक्सिजन ग्यास उत्पादनमा संलग्न एसबी ग्रुपसँग मिलेर ‘नेपाल गोल्ड’ ब्रान्डको लुब्रिकेन्ट र ग्रीज उत्पादन गर्न लागेको हो।

यी दुई समूहको लगानीमा सञ्चालित युनाइटेड लुब्रिकेन्ट्स इन्डष्ट्रिजले धनुषाको ढल्केवर-३ लालभित्ती चोकमा ल्युब आयल ब्लेन्डिङ प्लान्ट सञ्चालन गर्ने अन्तिम तयारी गरिरहेको बताएको छ।

वैशाखदेखि नै ‘नेपाल गोल्ड’ ब्रान्डको लुब्रिकेन्ट र ग्रीज नेपाली बजारमा उपलब्ध हुने कम्पनीले जनाएको छ। सत्यदीप इन्टरनेसनलका म्यानेजिङ डाइरेक्टर दीपेन्द्र मिश्रका अनुसार उद्योगको पूर्वाधार तयार भइसकेको र प्लान्टका मेसिनरी पनि जडान भइसकेको छ।

‘वैशाखदेखि नयाँ नेपाली लुब्रिकेन्टको उत्पादन हुनेछ। हामी नेपाल गोल्ड लुब्रिकेन्ट उत्पादनको प्रतीक्षामा छौ,’ उनले भने।

युनाइटेडले २ बिघा ५ कठ्ठा क्षेत्रफलमा फैलिएको ल्युब आयल ब्लेन्डिङ प्लान्ट र अन्य संरचना निर्माण गरेको छ। सो क्षेत्रमा ६ वटा स्टोरेज ट्यांकी रहनेछन् र २ हजार केएल लुब्रिकेन्ट स्टोरेज गर्न सकिने उनले बताए।

दैनिक रुपमा १५ हजार लिटर लुब्रिकेन्ट र १० हजार किलोग्राम ग्रीज उत्पादन गर्ने लक्ष्य रहेको मिश्र बताउँछन्। त्यसैगरी, तयारी उत्पादन राख्नका लागि २० हजार वर्गफिट क्षमताका दुई वटा स्टोर रहने छन्।

बहुराष्ट्रिय कम्पनीहरुको उत्पादन भन्दा आफ्नो लुब्रिकेन्ट र ग्रिजको गुणस्तरमा कमी नहुने मिश्रको दावी छ। अन्तर्राष्ट्रिय रुपमा उपलब्ध हुने एपीआई लगायतका विभिन्न गुणस्तर प्रमाण चिन्ह पाए बराबरको गुणस्तर हुने उनको जिकिर छ।

लुब्रिकेन्ट र ग्रीज उत्पादनका लागि आवश्यक उपकरण अन्तर्राष्ट्रिय स्तरकै हुने र कच्चा पदार्थमा पनि कुनै सम्झौता नगर्ने मिश्रको दाबी छ। उद्योग स्थापनाका लागि करिव ५० करोड रुपैयाँ लगानी भएको एसबी ग्रुपका संचालक बर्दन सर्राफले जानकारी दिए।

उनका अनुसार लुब्रिकेन्ट र ग्रीज प्याकिङको बकेट र अन्य सामग्री समेत कम्पनी आफैले उत्पादन गर्नेछ। बजारमा २५० एमएलदेखि २१० लिटरसम्मको प्याकिङमा लुब्रिकेन्ट र ग्रीज उपलब्ध हुने उनले बताए। यो उद्योगमा पहिलो चरणमा ५० जनाले रोजगारी पाउने सर्राफले बताए।