नेपाल र बंगलादेशको झल्को दिनेगरी भारतमा कक्रोच जनता पार्टीको प्रदर्शन, दिनभर अस्तव्यस्त

काठमाडौं। कक्रोच जनता पार्टी (सिजेपी) ले सोमबार भारतमा मनसुन अधिवेशन सुरु भएकै दिन मार्चपार्स गर्‍यो। प्रदर्शनको कारण सुरक्षाकर्मीलाई दिनभर अवस्था नियन्त्रणमा लिन हम्मे-हम्मे पर्‍यो। संसद् भवन वरपर रेलदेखि सडकसम्म बन्द गरेर प्रदर्शन नियन्त्रणमा लिनुपर्‍यो।

सिजेपीका नेतृत्व अभिजीत दिपकेले संसद् जाऔँ भन्दै मार्चपासको सुरु गरेका थिए। नयाँ दिल्लीको जन्तर मन्तरबाट मार्चपार्स सुरु भएको थियो। संसद् भवनमा बैठक चलिरहँदा बाहिर भने प्रदर्शन चर्किएको थियो। प्रदर्शनकारीले प्रधानमन्त्री नरेन्द्र मोदीको चर्को विरोध गरेका थिए। उनीहरूले नेपालको जेनजी आन्दोलनलाई देखाएर त्यस्तै प्रकृतिको आन्दोलन गर्ने भन्दै प्रदर्शनमा अभिव्यक्ति समेत दिएका थिए।

भदौ २३ र २४ गते नेपालमा जेनजी समूहले आह्वान गरेको प्रदर्शनमा संसद् भवनदेखि सिंहदरबारसमेत जलाएका थिए। तत्कालीन प्रधानमन्त्री केपी शर्मा ओलीदेखि मन्त्रीहरूलाई सेनाले सुरक्षित ठाउँमा सार्नुपरेको थियो।

भारतमा पनि संसद् भवन अगाडि भएको प्रदर्शन नियन्त्रणमा लिन प्रहरीले अश्रु ग्यास प्रहार गर्नुपर्‍यो। प्रहरीले प्रर्दशनस्थल जन्तर मन्तर पनि खाली गराएको थियो। त्यसपछि प्रदर्शन अन्य स्थानमा पुगेको थियो। दिनभर प्रहरी र प्रदर्शनकारीबिच भागदौड चलेको थियो।

प्रदर्शन बढेपछि सिजेपीको माग पुरा गर्न केन्द्रीय मन्त्री जेपी नड्डासँग भेटघाट भएको थियो। भारतीय सञ्चारमाध्यमका अनुसार करिब १० मिनेट भएको भेटमामा सिजेपीले मुख्य तीन वटा माग राखेको छ। जसमा सोनम वांगचुकलाई अस्पतालबाट नै रिहा गर्नुपर्ने पहिलो माग छ। भारतको मेडिकल प्रवेश परीक्षा (नीट २०२६) मा भएको भनिएको प्रश्नपत्र लिक र अनियमितताको विरोधमा नयाँ दिल्लीको जन्तर मन्तर पार्कमा आमरण अनशनमा बसिरहेका सोनामलाई प्रहरीले नियन्त्रणमा लिएर अस्पताल भर्ना गरेको छ।

वाङचुक लद्दाखका प्रसिद्ध शिक्षाविद्, वैज्ञानिक तथा वातावरण अभियन्ता हुन्।

उनलाई सुरक्षा निगरानी हटाएर तत्काल रिहा गर्नुपर्ने माग गरिएको छ। त्यस्तै  शिक्षामन्त्री धर्मेन्द्र प्रधानको राजीनामा पनि प्रदर्शनकारीको माग छ। तेस्रोमा आत्महत्या गर्ने छात्रको परिवारलाई एक करोड रुपैयाँ क्षतिपूर्ति दिनुपर्ने माग गरिएको थियो।